នៅល្ងាចថ្ងៃសុក្រ ៧រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៦ ខែមេសា ឆ្នាំ២០១៩ ក្រសួងមហាផ្ទៃបានចេញប្រកាសព័ត៌មានបញ្ជាក់អំពីករណីឃាត់ខ្លួនជនល្មើស ៣រូប ដែលនាំសាច់ប្រាក់ចូលមកកម្ពុជាដោយគ្មានប្រភពច្បាស់លាស់។ នៅក្នុងសេចក្តីប្រកាសព័ត៌មានបានឲ្យដឹងថា បន្ទាប់ពីការឃាត់ខ្លួនសួរចម្លើយ និងត្រួតពិនិត្យឯកសាររបស់ជនសង្ស័យទាំង ០៣ រួចមក សមត្ថកិច្ចបានរៀបចំបែបបទបញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីចាត់វិធានការបន្តតាមនីតិវិធី ច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ព្រមតែច្បាប់ និងលិខិតបទដ្ឋានគតិយុត្តពាក់ព័ន្ធជាធរមាន នៃព្រះរាជាណាចក្រកម្ពុជា។
សូមបញ្ជាក់ថា កាលពីថ្ងៃទី ២៣ ខែមេសា ឆ្នាំ ២០១៩ នៅអាកាសយានដ្ឋានអន្តរជាតិភ្នំពេញកងកម្លាំងនគរបាលអន្តោប្រវេសន៍ ក្រសួងមហាផ្ទៃ ព្រមទាំងមន្ត្រីមានសមត្ថកិច្ចនៃអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុបានឃាត់ខ្លួនជនសង្ស័យ ចំនួន ៣ រូប ដែលបាននាំចូលសាច់ប្រាក់ចំនួន ៣,៥២០,០០០ ដុល្លារអាមេរិក ដោយពុំមានការបញ្ជាក់អំពីប្រភពហិរញ្ញវត្ថុច្បាស់លាស់ ពីទីក្រុងហុងកុងចូលមកព្រះរាជាណាចក្រកម្ពុជា។ ជនល្មេីសទាំង៣នាក់រួមមានទី១- ឈ្មោះ Wang Shiping កាន់លិខិតឆ្លងដែនលេខEC9259330 មុខរបរ មិនពិតប្រាកដ, ទី២-ឈ្មោះ Wang Lichao កាន់ លិខិតឆ្លងដែនលេខED4367915 មុខរបរ មិនពិតប្រាកដ, និងទី៣- ឈ្មោះ Zhang Jian កាន់លិខិត ឆ្លងដែនលេខE 35414034 មិនមានលិខិតឆ្លងដែនជាប់ខ្លួន មុខរបរមិនពិតប្រាកដ៕ គឹមអាន
ដោយ៖ នាយកដ្ឋានព័ត៌មានវិទ្យា