នាព្រឹកថ្ងៃទី០៣ ខែឧសភា ឆ្នាំ២០២៣នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យឯកឧត្តម Justin Kevin ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា ដែលទើបតែងតាំងថ្មី និងសហការី ចូលជួបសម្ដែងការគួរសម។
ក្នុងជំនួបនោះដែរ សម្ដេចក្រឡាហោម ស ខេង បានសម្ដែងនូវការស្វាគមន៍ និងថ្លែងនូវការអបអរសារទ ដែលឯកឧត្តមត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពប្រចាំព្រះរាជាណាចក្រកម្ពុជា។ សម្តេចក្រឡាហោម ក៏បានឆ្លៀតយកឱកាសនេះជម្រាបជូនផងដែរថា ប្រទេសទាំងពីរមានទំនាក់ទំនងជាមួយគ្នាជាង៧០ឆ្នាំមកហើយ ទោះបីជាពេលខ្លះទំនាក់ទំនងនោះត្រូវបានកាត់ផ្តាច់ដោយសារតែស្ថានភាពនយោបាយនៅកម្ពុជា ក៏ប៉ុន្តែភាគីទាំងពីរបានបន្តរក្សានូវទំនាក់ទំនងនេះយ៉ាងល្អប្រសើរ។
សម្តេចក្រឡាហោម សង្ឃឹមជឿជាក់ថា តាមរយៈបេសកកម្មការទូតរបស់ឯកឧត្តម នៅកម្ពុជានឹងរួមចំណែកដល់ការពង្រឹង ពង្រីកទំនាក់ទំនងរវាងប្រទេសទាំងពីរឱ្យកាន់តែខ្លាំងក្លាថែមទៀត។ សម្តេចក្រឡាហោម បានគូសបញ្ជាក់ដែរថា ភាគីទាំងពីរពិតជាមានមូលដ្ឋានបង្អែករឹងមាំក្នុងទំនាក់ទំនងទ្វេរភាគីតាមរយៈទំនាក់ទំនងដ៏យូរឆ្នាំមកហើយនេះ ក៏មានទំនាក់ទំនងដ៏ល្អក្នុងកម្រិតតំបន់ផងដែរ ដោយមានអាស៊ាន និងអូស្ត្រាលី។
សម្តេចក្រឡាហោម ក៏បានជម្រាបជូនឯកអគ្គរដ្ឋទូតថា ក្រសួងមហាផ្ទៃក៏មានកិច្ចសហប្រតិបត្តិការ និងការផ្តល់ជំនួយពីសំណាក់អូស្ត្រាលីផងដែរ ជាពិសេសទៅលើការងារវិមជ្ឍការ និងវិសហមជ្ឍការ ដែលភាគីអូស្ត្រាលីបានជួយលើកិច្ចការងារនេះ ព្រមជាមួយការងារគណនេយ្យភាពសង្គម ដោយមានការចូលរួមជួយគាំទ្រពីសំណាក់អូស្ត្រាលី ផងដែរ។
ទន្ទឹមនឹងនេះដែរ សម្តេចក្រឡាហោម ក៏បានលើកឡើង អំពីដំណើរទស្សនកិច្ចរបស់សម្តេចជាមួយអតីត ឯកអគ្គរដ្ឋទូតអូស្ត្រាលី និងឯកអគ្គរដ្ឋទូតអាល្លឺម៉ង ព្រមទាំង ដៃគូរអភិវឌ្ឍន៍ផ្សេងទៀត ដែលបានធ្វើដំណើររួមគ្នាទៅតាមខេត្តមួយចំនួននៃព្រះរាជាណាចក្រកម្ពុជា ដើម្បីចូលរួមពិនិត្យលើការងារកំណែទម្រង់ ក៏ដូចជាការអភិវឌ្ឍន៍គម្រោងនានានៅមូលដ្ឋានរបស់កម្ពុជា។
មួយវិញទៀតសម្តេចក្រឡាហោម ជម្រាបជូននូវគម្រោងនគរបាលសហគមន៍ ដែលជាគម្រោងមួយទទួលបានការគាំទ្រពីភាគីអូស្ត្រាលី។ សម្តេចបានសម្តែងនូវការអរគុណចំពោះអូស្ត្រាលី ដែលបានរួមចំណែកធ្វើឱ្យសហគមន៍ទទួលបានសុខសុវត្ថិភាព តាមរយៈការចូលរួមជួយបណ្តុះបណ្តាលពង្រឹងសមត្ថភាពមន្រ្តីតាមសហគមន៍។ សម្តេចក្រឡាហោម ក៏បានណែនាំឱ្យបន្តជំរុញនឹងលើកទឹកចិត្ត ដល់ភាគីទាំងពីរបន្តអនុវត្តនូវការងារផ្សេងៗទៀតដែលក្រសួងមហាផ្ទៃមានជាមួយនគរបាលសហព័ន្ធអូស្ត្រាលីតាមរយៈការចុះកិច្ចព្រមព្រៀងជាមួយគ្នាកន្លងមកឱ្យកាន់តែទទួលបានលទ្ធផលល្អប្រសើរថែមទៀត។
ជាការឆ្លើយតប ឯកអគ្គរដ្ឋទូតអូស្ត្រាលី បានថ្លែងអំណរគុណចំពោះពាក្យពេជន៍ដ៏មានអត្ថន័យរបស់សម្តេចក្រឡាហោម ក្នុងនោះឯកឧត្តមផ្ទាល់ពិតជាមានសេចក្តីសប្បាយរីករាយដែលបានវិលត្រឡប់មកប្រទេសកម្ពុជាជាថ្មីម្តងទៀត ដោយឯកឧត្តមធ្លាប់បានបំពេញបេសកកម្មនៅប្រទេសកម្ពុជាអស់រយៈពេល២០ឆ្នាំមកហើយ ទន្ទឹមនឹងនេះឯកឧត្តម បានឯកភាពចំពោះការលើកឡើងរបស់សម្តេចក្រឡាហោម ទៅលើកិច្ចសហប្រតិបត្តិការទ្វេរភាគី ក៏ដូចជាទំនាក់ទំនងក្នុងកម្រិតតំបន់។
ឯកឧត្តមបានមានប្រសាសន៍បន្ថែមថា ក្នុងតួនាទីរបស់ឯកឧត្តម ជាឯកអគ្គរដ្ឋទូតអូស្ត្រាលី ឯកឧត្តមនឹងបន្តស្វែងរកឱកាស ដើម្បីពង្រីកទំនាក់ទំនងទ្វេភាគី ក៏ដូចជាពហុភាគីសំដៅធ្វើយ៉ាងណាដោះស្រាយបញ្ហា ក្តីកង្វល់រួមរបស់ភាគីទាំងពីរ។ ចំពោះកិច្ចសហការជាមួយក្រសួងមហាផ្ទៃ ឯកឧត្តម បានបង្ហាញការឯកភាពជាមួយការលើកឡើងរបស់សម្តេច ដោយអូស្ត្រាលីមានទំនាក់ទំនង និងកិច្ចសហប្រតិបត្តិការល្អជាមួយក្រសួងមហាផ្ទៃ ទាំងក្នុងក្របខណ្ឌរៀបចំនយោបាយ និងប្រតិបត្តិការការងារផ្ទាល់ផងដែរ។
ឯកឧត្តម ឯកអគ្គរដ្ឋទូតអូស្ត្រាលី បានសម្តែងនូវការរីករាយចំពោះលទ្ធផលនៃកិច្ចសហប្រតិបត្តិការកន្លងមករវាងនគបាលសហព័ន្ធអូស្ត្រាលី និងនគរបាលជាតិកម្ពុជា ជាមួយការងារប្រយុទ្ធប្រឆាំងការជួញដូរមនុស្ស ការកេញប្រវាញ់ផ្លូវភេទលើកុមារ ការប្រយុទ្ធប្រឆាំងនឹងការសម្អាតប្រាក់ ទោះបីជាទទួលបានលទ្ធផលល្អប្រសើរក្នុងការងារទាំងនេះហើយក៏ដោយ ក៏ភាគីអូស្ត្រាលីនៅតែបន្តសហការជំរុញ ពង្រឹង ពង្រីកទំនាក់ទំនាងលើការងារទាំងនេះឱ្យកាន់តែទទួលបានលទ្ធផលជាវិជ្ជមានកាន់តែច្រើនឡើងថែមទៀត។ ឯកឧត្តម ឯកអគ្គរដ្ឋទូត បានបន្តទៀតថាចំពោះការងារកិច្ចសហប្រតិបត្តិការកំណែទម្រង់វិមជ្ឍការ និងវិសហមជ្ឍការ ក៏ដូចជាការងារគណនេយ្យភាពសង្គម ឯកឧត្តម ពិតជាមានសេចក្តីរីករាយចំពោះកម្ពុជាដែលបានដំណើរការងារនេះ ក្នុងរយៈពេលប្រមាណជាង២០ឆ្លាំងកន្លងមក ហើយអូស្ត្រាលី ក៏រីករាយក្នុងការបន្តរួមចំណែកជួយកម្ពុជា ក្នុងការបន្តការងារនេះបន្តទៀត។ ក្រៅពីនេះឯកឧត្តម ឯកអគ្គរដ្ឋទូតអូស្ត្រាលី និងសម្តេចក្រឡាហោម បានជជែកផ្លាស់ប្តូរយោបល់ ទៅលើការងារមួយចំនួនរួមមាន៖ ការចូលរួមរបស់អង្គការសង្គមស៊ីវិលក្នុងដំណើរការអភិវឌ្ឍន៍សង្គមជាតិ និងស្ថានភាពនយោបាយនៅកម្ពុជា ឈានឆ្ពោះទៅកាន់ការងារបោះឆ្នោតជាតិនៅក្នុងខែកក្កដាខាងមុខ និងកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន។
ជាថ្មីម្តងទៀត សម្តេចក្រឡាហោម សូមថ្លែងអំណរគុណ និងជូនពរឯកអគ្គរដ្ឋទូតអូស្ត្រាលី សូមទទួលបានជោគជ័យក្នុងបេសកកម្មការងាររបស់ឯកឧត្តម ក្នុងព្រះរាជាណាចក្រកម្ពុជា៕
ដោយ៖ នាយកដ្ឋានព័ត៌មានវិទ្យា