ថ្នាក់ដឹកនាំក្រសួងមហាផ្ទៃ ទទួលជួបជាមួយតំណាងគណបក្សភ្លើងទៀន ដើម្បីពិភាក្សាការងារ
នារសៀលថ្ងៃសុក្រ ទី១២ ខែឧសភា ឆ្នាំ២០២៣នេះ ដោយទទួលបានការអនុញ្ញាតដ៏ខ្ពង់ខ្ពស់ ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ តំណាងក្រសួងមហាផ្ទៃ ដែលមាន ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ ឯកឧត្តម ឈឹម កាន អគ្គនាយករង និងជាប្រធាននាយកដ្ឋានកិច្ចការសមាគម និងគណបក្សនយោបាយនៃអគ្គនាយកដ្ឋានរដ្ឋបាល និងសហការី ទទួលជួបពិភាក្សាការងារជាមួយនឹងតំណាងគណបក្សភ្លើងទៀន ដែលបានដឹកនាំដោយ លោក ទាវ វណ្ណុល ប្រធានគណបក្សភ្លើងទៀន និងសហការី ចំនួន ៥រូបទៀត។
សូមជម្រាបជូនផងដែរថា ជំនួបពិភាក្សាការងារនេះធ្វើឡើងតាមសំណើរបស់គណបក្សភ្លើងទៀន ស្នើសុំជួបជាមួយតំណាងក្រសួងមហាផ្ទៃ ដើម្បីពិភាក្សាការងារ កាលពីថ្ងៃទី១១ ខែឧសភា ឆ្នាំ២០២៣៕
ដោយ ៖ នាយកដ្ឋានព័ត៌មានវិទ្យា
