នៅព្រឹកថ្ងៃទី២៦ ខែមីនា ឆ្នាំ២០២៤ នេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាទូកកានូ និងរ៉ូអ៉ីងកម្ពុជា បានអញ្ជើញដឹកនាំកិច្ចប្រជុំប្រចាំខែមីនា និងលើកទិសដៅការងារបន្ត របស់គណៈកម្មាធិការប្រតិបត្តិសហព័ន្ធកីឡាទូកកានូ និងរ៉ូអ៉ីងកម្ពុជា នៅសាលប្រជុំសម្តេចក្រឡាហោម ស ខេង ទីស្តីការក្រសួងមហាផ្ទៃ។

ឯកឧត្តមអភិសន្តិបណ្ឌិត ស សុខា ណែនាំឱ្យសហព័ន្ធកីឡាទូកកានូ និងរ៉ូអ៊ីងកម្ពុជា ត្រៀមលក្ខណៈសម្រាប់ដំណើរឆ្ពោះទៅកាន់ការប្រកួតកីឡាយុវជនអាស៊ី ឆ្នាំ២០២៩ ដែលកម្ពុជានឹងទទួលធ្វើជាម្ចាស់ផ្ទះជាលើកដំបូងក្នុងប្រវត្តិសាស្រ្ត បានក្លាយជាប្រធានបទសំខាន់មួយ ក្នុងកិច្ចប្រជុំពិនិត្យតាមដានលទ្ធផលការងាររបស់សហព័ន្ធកីឡាទូកកានូ និងរ៉ូអ៊ីងកម្ពុជា នាព្រឹកថ្ងៃទី២៦ ខែមីនា ឆ្នាំ២០២៤នេះ។ ក្នុងនាមជាប្រធានសហព័ន្ធកីឡាទូកកានូ និងរ៉ូអ៊ីងកម្ពុជា ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានផ្ដល់អនុសាសន៍ឱ្យសហព័ន្ធ ត្រៀមលក្ខណៈទាំងទីតាំងស្នាក់នៅ ទីតាំងហ្វឹកហាត់ និងធនធានកីឡាជាយុវជន ចាប់ពីពេលនេះទៅ បើទោះបីជាព្រឹត្តិការណ៍នោះនៅសល់ពេលជាង៥ឆ្នាំទៀតក៏ដោយ។ ឯកឧត្តមអភិសន្តិបណ្ឌិត ក៏បានណែនាំឱ្យសហព័ន្ធពិនិត្យ និងសិក្សាឱ្យបានគ្រប់ជ្រុងជ្រោយ នូវលក្ខន្តិកៈនៃការប្រកួតដែលពាក់ព័ន្ធ ក្នុងនោះសម្រាប់ធនធានយុវជនជាកីឡាករដែលត្រូវតម្រង់ទិស ក៏ត្រូវពិនិត្យមើលកម្រិតអាយុឱ្យបានសមមាត្រផងដែរ។ ក្រៅពីនេះ ឯកឧត្តមបានណែនាំឱ្យយកចិត្តទុកដាក់ពិនិត្យរកសាធាតុញៀនលើមន្រ្តីនិងកីឡាករ។ ឯកឧត្តមអភិសន្តិបណ្ឌិត បានណែនាំឯកឧត្តម សរ សិទ្ធិ រដ្ឋលេខាធិការក្រសួងមហាផ្ទៃ ទទួលជួយការងារដឹកនាំ អគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ សហការជាមួយសហព័ន្ធ និងរដ្ឋបាលខេត្ត រៀបចំទីតាំងគោល ទាំងការស្នាក់នៅ ធ្វើលំហាត់ប្រាណ និងហ្វឹកហាត់ឱ្យបានសមស្រប នៅមាត់ទន្លេវៃគោ ក្រុងស្វាយរៀង។ ព្រឹត្តិការណ៍កីឡាយុវជនអាស៊ី (AYG) ត្រូវបានរៀបចំដោយក្រុមប្រឹក្សាអូឡាំពិកអាស៊ី (OCA) ដោយចាប់ផ្តើមពីឆ្នាំ២០០៩មកនៅប្រទេសសិង្ហបុរី និងបន្ទាប់មកនៅសាធារណរដ្ឋប្រជាមានិតចិន។ ព្រឹត្តិការណ៍នេះនឹងរៀបចំលើកទី៤ នៅក្រុង Tashkent ប្រទេសអ៊ូសបេគីស្ថាន នាឆ្នាំ២០២៥ មុននឹងរៀបចំជាលើកទី៥ នៅរាជធានីភ្នំពេញ នាឆ្នាំ២០២៩៕

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ