លោកជំទាវ អុង សុភាវី រដ្ឋលេខាធិការក្រសួងមហាផ្ទៃ និងជាប្រធានក្រុមការងារយេនឌ័រ ក្រសួងមហាផ្ទៃ តំណាងដ៏ខ្ពង់ខ្ពស់ លោកជំទាវ កែ សួនសុភី ស សុខា អញ្ជើញចុះសួរទុក្ខកញ្ញាអនុសេនីយ៍ទោ ផាត ផល្លានីឡែន នាយរងប៉ុស្តិ៍នគរបាលរដ្ឋបាលស្រះចក នៃអធិការដ្ឋាននគរបាលខណ្ឌដូនពេញ ត្រូវជនល្មើសប្រើអំពើហិង្សា ដាល់ចំកណ្ដាលដើមទ្រូង អំឡុងពេលចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល កាលពីយប់ថ្ងៃទី២១ ឈានចូលថ្ងៃទី២២ ខែមីនា ឆ្នាំ ២០២៤ នៅគោលដៅសម្តេចសង្ឃ ជួនណាត សង្កាត់ចតុមុខ ខណ្ឌដូនពេញ ដោយមានការចូលរួមពីលោក អធិការនគរបាលខណ្ឌដូនពេញ លោកស្រីចៅសង្កាត់ស្រះចក ព្រមទាំងក្រុមការងារយេនឌ័រមួយចំនួន។
ក្មុងឱកាសនោះដែរ លោកជំទាវ បាននាំយកថវិកា របស់លោក ជំទាវ កែ សួនសុភី ស សុខា ចំនួន២លានរៀល ព្រមទាំងពាំនាំនូវអនុសាសន៍ផ្ដាំផ្ញើសួរសុខទុក្ខ និងកោតសរសើរចំពោះមន្ត្រី ដែលមានភាពក្លាហាន ចូលរួមគ្រប់សកម្មភាពដូចបុរសមិនថាយប់ឬថ្ងៃ ដើម្បីរក្សាសុខសុវត្ថិភាព សន្តិសុខ ជូនប្រជាពលរដ្ឋ៕
ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ