នាព្រឹកថ្ងៃចន្ទ ១០រោច ខែចេត្រ ឆ្នាំច ឯកស័ក ព.ស២៥៦២ ត្រូវនឹងថ្ងៃទី២៩ ខែមេសា ឆ្នាំ ២០១៩ នៅសាលាខណ្ឌច្បារអំពៅ មានរៀបចំប្រជុំត្រួតពិនិត្យគម្រោងសាកល្បងការព្យាបាលអ្នកញៀនគ្រឿងញៀន ដែលបានដាក់ឲ្យអនុវត្តន៍នៅសង្កាត់ចំនួនពីររបស់ខណ្ឌច្បារអំពៅ មានសង្កាត់ច្បារអំពៅ១ ច្បារអំពៅ ២ ក្រោមវត្តមានលោក លឹម តុងហួត ប្រធាននាយកដ្ឋាននីតិកម្ម អប់រំ និងស្តានីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងលោក ហ៊ត គឹមនី អភិបាលរងខណ្ឌច្បារអំពៅ តំណាងប្រធានគណកម្មាធិការត្រួតពិនិត្យគ្រឿងញៀនខណ្ឌច្បារអំពៅដោយមានការចូលរួមពីតំណាងវិស័យសុខាភិបាលនិងអ្នកពាក់ព័ន្ធសរុបចំនួន៣០រួប។
លោក ហ៊ត គឹមនី អភិបាលរងខណ្ឌច្បារអំពៅ បានមានប្រសាសន៍ស្វាគមន៍ និងសម្តែងនូវការសប្បាយរីករាយចំពោះការខិតខំធ្វើការរួមគ្នាដោយស្មោះត្រង់ជួយសម្របសម្រួលជម្រុញ និងព្យាបាលអ្នកញៀនគ្រឿងញៀនទៅទទួលការព្យាបាលនៅមន្ទីរពេទ្យបង្អែកមានជ័យ។
លោកវេជ្ជ បណ្ឌិត ស៊ិន អ៊ាប តំណាងនាយកដ្ឋានសុខភាព ផ្លូវចិត្ត និងការប្រើបំពានគ្រឿងញៀន បានបង្ហាញពីរបាយការណ៍ លទ្ធផល ចំណុចខ្លាំង ចំណុចខ្សោយ និងបញ្ហាប្រឈមនានារួមគ្នាគិត រួមគ្នាធ្វើ ដើម្បីឆ្ពោះទៅការអនុវត្តការងារឲ្យទទួលបានជោគជ័យបន្ថែមទៀត។
លោក លឹ ម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានប្រសាសន៍ថា ក្នុងនាមតំណាងឲ្យ ឯកឧត្តមនាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន សូមថ្លែងអំណរគុណ សាទរចំពោះលទ្ធផលដែលយើងទាំងអស់គ្នារួមគ្នាខិតខំបំពេញការរហូតទទួលបានលទ្ធផលល្អ ជាលំដាប់ តាមរយ:ការផ្សព្វផ្សាយអប់រំ ឲ្យក្រុមគ្រួសារ អាណាព្យាបាល បានយល់ដឹងហើយសហការជាមួយសមត្ថកិច្ច បានបញ្ជូនអ្នកញៀនគ្រឿងញៀនទៅទទួលយកសេវាព្យាបាល ដោយមិនគិតថ្លៃនៅមូលដ្ឋានសុខាភិបាល៕ គឹមអាន
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន