ព្រឹកថ្ងៃទី២៤ ខែឧសភា ឆ្នាំ២០២២ ឯកឧត្តម គង់ គឹមនី អភិបាលរងខេត្តខេត្តក្រចេះ តំណាងឯកឧត្តម វ៉ា ថន អភិបាលខេត្តខេត្តក្រចេះ និងឯកឧត្តម តាន់ យុវរដ្ឋ អគ្គនាយករងនៃអគ្គនាយកដា្ឋនជំរុញពាណិជ្ជកម្ម នៃក្រសួងពាណិជ្ជកម្ម អញ្ជើញជាគណៈអធិបតីក្នុងសិក្ខាសាលាបឹ្រក្សាយោបល់ស្តីពី“ពង្រឹងសមត្ថភាពអ្នកផលិត និងកែច្នៃផលិតផលក្នុងការស្វែងរកទីផ្សារក្នុងនិងក្រៅប្រទេស” នៅខេត្តក្រចេះ ដោយមានការអញ្ជើញចូលរួមពីមន្ទីរពាក់ព័ន្ធអាជ្ញាធរដែនដី សភាពាណិជ្ជកម្មកម្ពុជាខេត្ត ជាពិសេសសមាគមសិប្បករ ផលិតករ ពាណិជ្ជករក្នុងខេត្តក្រចេះ ។
សិក្ខាសាលាធ្វើឡើងក្នុងគោលបំណងគឺដើម្បី-ផ្តល់ប្រឹក្សាយោបល់អំពីកិច្ចសម្របសម្រួល ក្នុងការបង្កើនផលិតកម្ម និងកែច្នៃប្រកបដោយគុណភាព សុវត្ថិភាពដោយមាន អនាម័យស្តង់ដារ សំដៅពង្រីកទីផ្សារនាំចេញ និងដើម្បីបង្កើនទំនុកចិត្តរបស់អ្នកប្រើប្រាស់ ផលិតផលក្នុងស្រុកទូទៅ និងរួមចំណែកកាត់បន្ថយការនាំចូលផលិតផលបរទេស-ពង្រឹងសមត្ថភាពអ្នកផលិតឱ្យអភិវឌ្ឍន៍ផលិតផលរបស់ខ្លួនប្រកបដោយស្តង់ដារជាតិនិងអន្តរជាតិ៣. បង្កើនកម្លាំងពលកម្មក្នុងស្រុក និងកាត់បន្ថយការធ្វើចំណាកស្រុក-យល់ដឹងពីនីតិវីធីជំរុញការនាំចេញផលិតផលខ្មែរទៅកាន់ទីផ្សារក្រៅប្រទេស ។
ឯកឧត្តម គង់ គឹមនី អភិបាលរងខេត្តក្រចេះ បានបញ្ជាក់ថា ៖ ក្នុងវិស័យឧស្សាហកម្ម យើងមានរោងចក្រកែឆ្នៃម្សៅដំឡងមី ចំនួន២កន្លែង មួយកំពុងដំណើរការដែលតម្រូវការដំឡូងមីស្រស់ ប្រមាណ១ពាន់តោនក្នុងមួយថ្ងៃ ស្ថិតនៅក្រុងក្រចេះមួយកន្លែងទៀតកំពុងសាងសង់ និងអាចដំណើរការនៅពេលឆាប់ៗខាងមុខនេះ ស្ថិតនៅតំបន់សេដ្ឋកិច្ចពិសេសក្នុងស្រុកស្នួល។ ហើយវិស័យពាណិជ្ជកម្ម យើងមានផ្សារធំៗចំនួន០៧កន្លែង និងមូលដ្ឋានអាជីវកម្មពាណិជ្ជកម្មចំនួន១,៨៦១កន្លែង ព្រមទាំងមានក្រុមហ៊ុនកំពុងធ្វើពាណិជ្ជកម្មមានទីតាំងក្នុងខេត្តចំនួន១១៩ក្រុមហ៊ុនសាខាក្រុមហ៊ុនចំនួន ៣៨ សហគ្រាសចំនួន១១១នឹងមានច្រកសម្រាប់នាំចេញទៅក្រៅប្រទេសចំនួន២ គឺច្រកអន្តរជាតិត្រពាំងស្រែនិងច្រកទ្វេភាគីជ័យឃ្លាំង ស្ថិតនៅស្រុកស្នួល ខេត្តក្រចេះ ។
ក្នុងនោះដែរឯកឧត្តម តាន់ យុវរដ្ឋ អគ្គនាយករងនៃអគ្គនាយកដា្ឋនជំរុញពាណិជ្ជកម្ម នៃក្រសួងពាណិជ្ជកម្ម បានបញ្ជាក់បន្ថែមថា ៖ រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការបាន និងកំពុងខិតខំធ្វើសមាហរណកម្មសេដ្ឋកិច្ចជាមួយប្រទេសនានានៅលើពិភពលោក តាមរយៈការចរចា សម្របសម្រួលដោះស្រាយបញ្ហារបាំងពន្ធគយ និងមិនមែនពន្ធគយដើម្បីនាំទំនិញកម្ពុជាចេញទៅក្រៅប្រទេសទទួលបានជោគជ័យ ។
ជាក់ស្ដែងក្នុងពេលថ្មីៗនេះ ក្រោយពីកម្ពុជាបានចុះកិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចព្រមព្រៀងពាណិជ្ជកមម្មកម្ពុជា-កូរ៉េ រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការបានកំណត់យក កសិផលសក្តានុពល១០មុខដែលត្រូវជំរុញផលិតកម្មនិងការនាំចេញដើម្បីទាញយកផលប្រយោជន៍ឱ្យបានច្រើន ពីកិច្ចព្រមព្រៀងពាណិជ្ជកម្មសេរីនេះ ។
ឯកឧត្តមបន្តថា ៖ផលិតផលទាំង១០មុខនោះរួមមាន៖ស្រូវ-អង្ករ, ដំឡូងមី, ចេក,មៀនប៉ៃលិន, ស្វាយ, ស្វាយចន្ទី, សាច់សត្វ, ជ័រកៅស៊ូ, ម្នាស់ និងម្រេច ។ ទន្ទឹមនឹងរាជរដ្ឋាភិបាលកម្ពុជាបាន និងកំពុងយកចិត្តទុកដាក់ជំរុញការផលិតការផ្គត់ផ្គង់ក្នុងស្រុក និងការនាំចេញ ដូច្នេះក្នុងនាមយើងជាផលិតករ សិប្បករ ពាណិជ្ជករ សហគ្រិន ត្រូវខិតខំបន្ថែមទៀត ក្នុងការអភិវឌ្ឍសមត្ថភាពផលិត ការកែច្នៃនិងវេចខ្ចប់ផលិតផលរបស់ខ្លួនឱ្យមានគុណភាព សោភណភាពសុវត្ថិភាពស្របតាមស្តង់ដា និងត្រូវដាក់ម៉ាកយីហោ ថ្ងៃ-ខែ-ឆ្នាំផលិត និងផុតកំណត់ បិទស្លាកតម្លនិងបារកូដផលិតផលជាដើម ៕
ប្រភព៖ រដ្ឋបាលខេត្តក្រចេះ