នៅព្រឹកថ្ងៃពុធ ៧រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែមីនា ឆ្នាំ២០១៩ ឯកឧត្ដម ខ្លូត ផន ប្រធានក្រុមប្រឹក្សាខេត្ត និងឯកឧត្ដម គួច ចំរើន អភិបាល នៃគណៈអភិបាល ខេត្តកំពង់ចាម បានចុះប្រជុំអប់រំ ណែនាំ ដល់មន្ត្រីរាជការ នៅសាលាស្រុកកំពង់សៀម ដើម្បីពង្រឹងការអនុវត្តតួនាទីភារកិច្ច របស់មន្ត្រីរាជការ នៅថ្នាក់មូលដ្ឋាន ជាពិសេស ការផ្លាស់ប្ដូរឥរិយាបថ ក្នុងការបំរើសេវាសាធារណៈ ឲ្យកាន់តែល្អប្រសើរ ថែមទៀត។ កិច្ចប្រជុំនេះមានការចូលរួម ពីមន្ត្រីការិយាល័យចំណុះសាលាស្រុក មេឃុំ ស្មៀនឃុំ មេភូមិ និងមន្ត្រីនគរបាលប៉ុស្ដិ៍ ទូទាំងស្រុកកំពង់សៀម ផងដែរ ។
ឯកឧត្ដម គួច ចំរើន អភិបាលខេត្តកំពង់ចាមបានថ្លែងថា ការចុះមកបំពេញបេសកម្មរបស់ថ្នាក់ដឹកនាំខេត្តនាពេលនេះ ដើម្បីស្ដាប់នូវចំណុចខ្វះខាត និងធ្វើការណែនាំ អប់រំ ដល់មន្ត្រីគ្រប់លំដាប់ថ្នាក់ ក្នុងមូលដ្ឋាន ឲ្យយកចិត្តទុកដាក់ ក្នុងការអនុវត្តតួនាទី ភារកិច្ច ស្របទៅតាមនីតិវិធីច្បាប់ និងគោលការណ៍ណែនាំនានា ដោយជៀសវាងការអនុវត្តភារកិច្ច ទៅតាមទម្លាប់ ក៏ដូចជា ការអនុវត្ត ដោយរំលោភអំណាច និងដែនសមត្ថកិច្ចគ្នា ។ ឯកឧត្ដមបានរំលឹកថា រាជរដ្ឋាភិបាលកម្ពុជា កំពុងអនុវត្តគោលនយោបាយកំណែទម្រង់លើគ្រប់ផ្នែកគ្រប់វិស័យ ចាប់តាំងពីឆ្នាំ២០០២ មកម៉្លេះ និងមានរយៈពេល ១៧ឆ្នាំ កន្លងទៅហើយ ។ ដោយឡែក ក្នុងអាណត្តិ ទី៦នេះ រាជរដ្ឋាភិបាល កំពុងផ្ដោតទៅលើ ការអនុវត្តនូវអភិក្រមទាំង ៥ មានដូចជា ៖ ងូតទឹក ដូសក្អែល ឆ្លុះកញ្ចក់ ព្យាបាល វះកាត់ ។ យ៉ាងម៉ិញ មកដល់ពេលនេះ គ្មាននរណាម្នាក់ អាចគេចផុត ពីការអនុវត្តលើកំណែទម្រង់ស៊ីជម្រៅ ជាពិសេស លើការអនុវត្តនូវអភិក្រមទី៥ ដែលអាចនិយាយថា មិនត្រឹមតែមន្ត្រីរាជការប៉ុណ្ណោះទេ សូម្បីវិស័យឯកជនក៏ត្រូវបានអនុវត្តរួចមកហើយដែរ ពោលគឺ ជនណាដែលបានប្រព្រឹត្តខុសច្បាប់ត្រូវមកទទួលទោសទៅតាមផ្លូវច្បាប់។ ដូច្នេះហើយថ្នាក់ដឹកនាំខេត្ត មិនចង់ឃើញមន្ត្រីយើងមានកំហុស រហូតដល់ត្រូវអនុវត្តអភិក្រមទី៥នោះទេ ទើបពេលនេះយើងធ្វើការណែនាំ អប់រំ ក្នុងគោលបំណង ឲ្យមន្រ្តីមានសមត្ថភាព និងចំណេះដឹង ហើយផ្លាស់ប្ដូរនូវឥរិយាបទ ខិតខំអនុវត្តតួនាទី ភារកិច្ចស្នូល ដើម្បី បំរើសេវាជូនប្រជាពលរដ្ឋ ឲ្យបានកាន់តែល្អ ប្រសើរឡើងថែមទៀត ។
សូមបញ្ជាក់ដែរថា កិច្ចប្រជុំខាងលើនេះគឺបានធ្វើឡើងបន្ទាប់ពីបានទទួលទិន្នន័យខ្លះៗ នូវចំណុចខ្វះខាត នៃការអនុវត្តតួនាទីភារកិច្ច របស់មន្ត្រីអាជ្ញាធរមូលដ្ឋាន ពីមន្ទីរអធិការកិច្ច ខេត្តកំពង់ចាម គណៈអភិបាលខេត្ត និងក្រុមប្រឹក្សាខេត្តកំពង់ចាម បានរៀបចំបេសកកម្ម បើកកិច្ចប្រជុំតាមបណ្តាស្រក-ក្រុង ដោយចាប់ផ្តើម ពីក្រុងកំពង់ចាម និងឈានទៅបណ្ដាស្រុកមួយចំនួនទៀត ដើម្បី ណែនាំ អប់រំដល់មន្ត្រីនៅថ្នាក់មូលដ្ឋាននីមួយៗ៕ គឹមអាន
ប្រភព៖ រដ្ឋបាលខេត្តកំពង់ចាម