នៅព្រឹកថ្ងៃពុធ ៧រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែមីនា ឆ្នាំ២០១៩ ឯកឧត្តម វ៉ា ថន អភិបាលខេត្តក្រចេះ បានអញ្ជើញជួបសំណេះសំណាលជាមួយនិង​នាយ-​នាយរង​នគរបាលនៃវរការពារព្រំដែនគោកលេខ៦១៩ ចំណុះឲ្យស្នងការដ្ឋាន នគរបាលខេត្ត ដើម្បីអបអរ​ពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងប្រព្រឹត្តទៅនាពេលខាងមុខនេះ។ 

    ឯកឧត្តម វ៉ា ថន បានសម្តែងនូវការកោត សសើរ និងលើកទឹកចិត្តដល់ កម្លាំងនគរបាលវរការពារព្រំដែន ដែលកន្លងមកមានការយកចិត្តទុកដាក់ និងភារកិច្ចការងារ បានសហការគ្នាជាមួយប្រទេសជាប់ព្រំដែន ដើម្បីរួមគ្នារក្សាបានល្អនូវសន្តិសុខតាមខ្សែបន្ទាត់ព្រំដែន។ ឯកឧត្តមអភិបាលខេត្តបាន​ជម្រុញឲ្យ​នគរបាលវរការពារព្រំដែនទាំងអស់ខិតខំបម្រើសេវាសាធារណៈជូនប្រជាពរដ្ឋដែលរស់តាមខ្សែបន្ទាត់ព្រំដែន និងការរឹតបន្តឹងសាមគ្គីភាពផ្ទៃក្នុង ពង្រឹងវិន័យ និងក្រមសីលធម៌ ការរួមគ្នាបង្ករបង្កើនផល។ ជាមួយគ្នានោះដែរ ឯកឧត្តមអភិបាលខេត្តបានផ្តល់ថវិការជូនអង្គភាពនគរ​បាលវរការពារព្រំដែនចំនួន​៥លានរៀល និងផ្តល់ជូននគរបាលវរការពារព្រំដែនចំនួន១៣០នាក់ ក្នុង១នាក់៣ម៉ឺនរៀល និងផ្តល់ជូននូវគ្រឿងឧបភោគបរិភោគមួយចំនួនធំទៀតផងដែរ៕ គឹមអាន

ប្រភព៖ រដ្ឋបាលខេត្តក្រចេះ