នៅព្រឹកថ្ងៃពុធ ទី៣០ ខែឧសភា ឆ្នាំ២០១៨ រដ្ឋបាលខេត្តរតនគិរី បានរៀបចំពិធីប្រកាសចូលកាន់មុខតំណែងអភិបាលស្រុកតាវែង ក្រោមអធិបតីភាពលោក ថង សាវុន អភិបាលខេត្ត ។ លោក សូ វណ្ណធិន ត្រូវបានរាជរដ្ឋាភិបាលកម្ពុជា តែងតាំងជាអភិបាលស្រុកតាវែង ជំនួសលោក មួង ប៉ាង ដែលត្រូវបានតែងតាំងជាអភិបាលរងខេត្ត ។ ឯកឧត្តម ថងឯកឧត្តមអភិបាលខេត្ត បានជំរុញឲ្យមន្ត្រីទាំងអស់នៃរដ្ឋបាលស្រុកតាវែង ត្រូវមានស្មារតីសាមគ្គីភាពផ្ទៃក្នុង និងលើកកម្ពស់ប្រសិទ្ធភាពការងារ និងផ្តល់សេវាសាធារណៈ សេវាតម្រូវការនានាជូនប្រជាពលរដ្ឋឲ្យបានល្អប្រសើរ ស្របទៅតាមគោលនយោបាយកំណែទម្រង់រដ្ឋបាលសាធារណៈរបស់រាជរដ្ឋាភិបាលកម្ពុជា អនុវត្តឲ្យបាននូវបទបញ្ចារបស់រាជរដ្ឋាភិបាល ក្នុងការទប់ស្កាត់ឲ្យបាននូវបទល្មើសគ្រប់ប្រភេទនៅក្នុងរដ្ឋបាលដែនដីរបស់ខ្លួន ។ ទន្ទឹមគ្នានេះឯកឧត្តមក៏បានណែនាំឲ្យអាជ្ញាធរ កងកម្លាំងតាំងអស់ត្រូវសហការគ្នារក្សាសន្តិសុខសណ្តាប់ធ្នាប់ ស្ថិរភាពសង្គម ទាំងមុនពេល និងក្រោយពេលបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ខាងមុខនេះ ឲ្យបានល្អប្រសើរ។ ប្រភពព័ត៌មាន:រដ្ឋបាលខេត្តរតនគិរី (ថ្ងៃទី៣០ ខែឧសភា ឆ្នាំ២០១៨)