ខេត្តកណ្ដាល៖ នៅថ្ងៃទី១៣ ខែធ្នូ ឆ្នាំ២០២៤នេះ រដ្ឋបាលខេត្តកណ្តាល បានរៀបចំកិច្ចប្រជុំសាមញ្ញក្រុម​ប្រឹក្សាខេត្តលើកទី៧ អាណត្តិទី៤ របស់ក្រុមប្រឹក្សាខេត្តកណ្តាល នៅសាលាខេត្តកណ្តាល ដែលបានដឹកនាំកិច្ចប្រជុំដោយ ឯកឧត្តម នូ សាខន ប្រធានក្រុមប្រឹក្សាខេត្ត និង ឯកឧត្តម ឌឹម ប៉ូរ៉ា អភិបាលរងខេត្តតំណាង ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល ដោយមានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត កងកម្លាំងប្រដាប់អាវុធទាំងបី លោក លោកស្រី ប្រធាន អនុប្រធានមន្ទីរអង្គភាពនានាជុំវិញខេត្ត នាយក នាយករងរដ្ឋបាលសាលាខេត្ត នាយក នាយករងទីចាត់ការអង្គភាពចំណុះសាលាខេត្ត។

ថ្លែងក្នុងកិច្ចប្រជុំនេះ ឯកឧត្តម នូ សាខន ប្រធានក្រុមប្រឹក្សាខេត្ត បានស្នើឱ្យសមាជិកអង្គប្រជុំទាំងមូល ត្រូវបង្កើនការយកចិត្តទុកដាក់ក្នុងការពិនិត្យ ពិភាក្សា អនុម័ត និងចូលរួមដោះស្រាយបញ្ហាប្រឈមនានាដែលលើកឡើងក្នុងកិច្ចប្រជុំ ដោយមន្ទីរអង្គភាពជុំវិញខេត្ត ស្របទៅតាមរបៀបវារៈនីមួយៗដែលបានកំណត់ ដោយស្មារតីទទួលខុសត្រូវខ្ពស់ សំដៅឆ្លើយតបទៅតាមតម្រូវការ របស់ប្រជាពលរដ្ឋក្នុងខេត្ត ស្របតាមគោលការណ៍ដែលរាជរដ្ឋាភិបាលបានណែនាំ។ 

ឯកឧត្តមប្រធានក្រុមប្រឹក្សាខេត្ត បានស្នើដល់សមាជិកក្នុងអង្គប្រជុំទាំងអស់ត្រូវរួមគ្នាពិនិត្យ និងបំពេញបន្ថែមលើចំណុចដែរខ្វះខាតលើរបាយការណ៍សំខាន់ៗដែលបានដាក់ឆ្លងក្នុងកិច្ចប្រជុំ ព្រមទាំងបានជំរុញដល់អាជ្ញាធរគ្រប់លំដាប់ថ្នាក់ និងមន្ទីរពាក់ព័ន្ធ ត្រូវខិតខំពន្លឿនដោះស្រាយបញ្ហាប្រឈមនានាដែលប្រជាពលរដ្ឋបានលើកឡើងនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តលើកទី១ អាណត្តិទី៤ ដែលបានរៀបចំឡើងតាមបណ្ដាលក្រុង-ស្រុកនាពេលកន្លងមកផងដែរ។

ក្នុងកិច្ចប្រជុំនេះដែរ ឯកឧត្តមប្រធានក្រុមប្រឹក្សាខេត្ត បានធ្វើការក្រើនរំលឹកដល់កម្លាំងមានសមត្ថកិច្ច និងអាជ្ញាធរក្រុង-ស្រុកទាំង១៣ ត្រូវខិតខំបន្តការយកចិត្តទុកដាក់ខ្ពស់ទៅលើការងារបង្ក្រាប និងតាមដាននូវរាល់មុខសញ្ញាបទស្មើសល្បែងស៊ីសងខុសច្បាប់គ្រប់ប្រភេទ ជាពិសេសល្បែងតាម Online ខុសច្បាប់ផ្សេងៗ ដើម្បីចិត្តវិធានការបង្ក្រាបឱ្យអស់ពីមូលដ្ឋានរបស់ខ្លួន។

សូមជម្រាបដែរថា ក្នុងកិច្ចប្រជុំនេះ ក្រុមប្រឹក្សាខេត្តបានធ្វើការពិនិត្យ ពិភាក្សា អនុម័ត និងផ្សព្វផ្សាយលិខិតបទដ្ឋានគតិយុត្តនានា ដែលសរុបមានចំនួន ៩របៀបវារៈសំខាន់ៗ។

ប្រភព៖ រដ្ឋបាលខេត្តកណ្ដាល