តាកែវ៖ នៅព្រឹកថ្ងៃទី២៩ ខែតុលា ឆ្នាំ២០២៦ នេះ នៅបរិវេណសួនច្បារមាត់បឹងតាកែវ រដ្ឋបាលខេត្តតាកែវបានរៀបចំ ព្រះរាជពិធីអបអរសាទរខួបលើកទី២២ នៃការយាងគ្រងព្រះបរមសិរីរាជសម្បត្តិ (២៩ តុលា ២០០៤ - ២៩ តុលា ២០២៦) ថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យ៉ាងអធិកអធម ។

ក្នុងព្រះរាជពិធីដ៏ឧត្ដុង្គឧត្ដម និងប្រសើរថ្លៃថ្លានេះ មានការអញ្ជើញចូលរួមពីសំណាក់ ឯកឧត្តម យស ណាស៊ី ប្រធានក្រុមប្រឹក្សាខេត្ត និង ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ ព្រមទាំង ឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត លោក លោកស្រី ប្រធាន-អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ អភិបាល-អភិបាលរងក្រុង ស្រុក និងប្រធានក្រុមប្រឹក្សាក្រុង ស្រុកទូទាំងខេត្ត ដោយបានអញ្ជើញដាក់កម្រងផ្កា និងទស្សនាការសម្ដែងរបាំជូនពរ ដើម្បីថ្វាយព្រះពរជ័យជូន ព្រះករុណាជាអម្ចាស់ជីវិតលើត្បូង។

នាឱកាសដ៏នក្ខត្តឫក្សនោះ ឯកឧត្តម វ៉ី សំណាង អភិបាលខេត្តតាកែវ បានអាន សារលិខិតថ្វាយ ព្រះពរ តំណាងឱ្យថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តតាកែវ ដោយបានលើកហត្ថទាំងទ្វេបួងសួងដល់គុណ បុណ្យព្រះរតនត្រ័យ វត្ថុស័ក្តិសិទ្ធិទាំងអស់ក្នុងលោក ទេវតារក្សាព្រះមហាស្វេតច្ឆត្រ ព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ និងព្រះបរមរតនកោដ្ឋ សូមព្រះអង្គតាមបីបាច់ថែរក្សាប្រោះព្រំសព្ទសាធុការពរ សិរីសួស្តី ជ័យមង្គល និងវិបុលសុខគ្រប់ប្រការ ថ្វាយព្រះករុណាជាអម្ចាស់ជីវិតលើត្បូង។

មន្ត្រីរាជការ និងប្រជាពលរដ្ឋខេត្តតាកែវ សូមបួងសួងឱ្យព្រះអង្គ ទ្រង់មានព្រះរាជសុខភាពបរិបូរណ៍ ព្រះរាជកាយពលវិបុលមាំមួន ព្រះបញ្ញាញាណឈ្លាសវៃ និងព្រះជន្មាយុយឺនយូរ ដើម្បីគង់ប្រថាប់ជាម្លប់ដ៏ត្រជាក់ដល់ប្រជានុរាស្ត្រខ្មែរគ្រប់រូប និងសូមព្រះអង្គទรงប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជាភិយ្យោភាពតរៀងទៅ៕

ប្រភព៖ រដ្ឋបាលខេត្តតាកែវ