នៅរសៀលថ្ងៃពុធ ១៤កើត ខែអស្សុជ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៦ ខែ តុលា ឆ្នាំ២០២៤ ឯកឧត្តម អ៊ុយ រី ប្រធានក្រុមប្រឹក្សាខេត្ត និងលោកជំទាវ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងលោកជំទាវ បានអញ្ជើញបើកកម្មវិធីបុណ្យអុំទូក និងបណ្តែតប្រទីប ក្នុងឱកាសបុណ្យចេញព្រះវស្សានៅខេត្តបាត់ដំបង ឆ្នាំ២០២៤ នៅវេទិការអុំទូកខេត្តបាត់ដំបង ។

ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានបញ្ជាក់ថា គោលបំណងនៃការបើកការប្រណាំងទូក និងបណ្តែតប្រទីប នាពេលនេះ ដើម្បីបង្កបរិយាកាសជូនប្រជាពលរដ្ឋនៅក្នុងខេត្តបាត់ដំបង និងប្រជាពលរដ្ឋតាមបណ្តាខេត្តនានា ព្រមទាំងភ្ញៀវអន្តរជាតិ បានទស្សនាកម្សាន្តសប្បាយរីករាយ និងចូលរួមថែរក្សានូវប្រពៃណីជាតិ ដែលជាប់ទាក់ទងទៅនឹងប្រវត្តិសមយុទ្ធនៃកម្លាំងសាមគ្គីកងទ័ពជើងទឹករបស់បុព្វបុរសខ្មែរយើងពីអតីតកាល និងបានសំដែងនូវការគោរពដឹងគុណដ៏ស្មោះអស់ពីដួងចិត្តដល់បុព្វបុរសខ្មែរយើង ដែលបានរក្សា និងការពារបាននូវបូរណភាពទឹកដីនៃព្រះរាជាណាចក្រកម្ពុជាយើង ។ឯកឧត្តម បានចាត់ទុកថា ការចូលរួមពីសំណាក់ប្រជាពលរដ្ឋយ៉ាងច្រើនកុះករនាពេលនេះ គឺពិតជាបានបង្ហាញឱ្យឃើញពីទឹកចិត្តស្រឡាញ់ និងការចូលរួមគាំទ្រដល់វិស័យកីឡា ជាពិសេស បានលើកស្ទួយវប្បធម៌ កេរ្តិ៍ដំណែល ប្រពៃណីរបស់បុព្វបុរសខ្មែរ ព្រមទាំងឆ្លុះបញ្ចាំងពីស្មារតីសាមគ្គីភាព មិត្តភាព ភាតរភាព និងបង្កការសប្បាយរីករាយជូនប្រជាពលរដ្ឋ ដែលបានសម្រាកពីការនឿយហត់ក្នុងការងារបង្កបង្កើនផល និងកិច្ចការងារផ្សេងៗផងដែរ ។

ជាទូទៅពិធីប្រណាំងទូកនៅខេត្តបាត់ដំបង តែងតែរៀបចំត្រូវនឹងថ្ងៃចេញព្រះវស្សា គឺថ្ងៃ១៤-១៥ កើត ខែអស្សុជ ដើម្បីផ្សារភ្ជាប់ទៅតាមទំនៀមទម្លាប់ប្រពៃណី និងវប្បធម៌របស់ប្រជាពលរដ្ឋ ក្នុងខេត្តបាត់ដំបង ។សូមបញ្ជាក់ថា នៅក្នុងព្រឹត្តិការណ៍បុណ្យអុំទូក បណ្តែតប្រទីបខេត្តបាត់ដំបង ឆ្នាំនេះ គណៈកម្មការខេត្ត បានរៀបចំឱ្យមានកម្មវិធីមួយចំនួនដូចជា ការប្រណាំងទូក បណ្តែតប្រទីប បង្ហោះគោម បាញ់កាំជ្រួច ការតាំងពិព័រណ៍ផលិតផល ការប្រគុំតន្ត្រីកម្សាន្ត ដើម្បីទាក់ទាញភ្ញៀវទេសចរជាតិ អន្តរជាតិ និងប្រជាពលរដ្ឋគ្រប់មជ្ឈដ្ឋានមកទស្សនាកម្សាន្ត រួមទាំងទស្សនានូវសមិទ្ធផលនានានៅក្នុងក្រុង និងខេត្តបាត់ដំបង ដែលកំពុងមានការអភិវឌ្ឍរីកចម្រើនគួរឱ្យកត់សម្គាល់ ។

នៅក្នុងឆ្នាំនេះមានទូកចូលរួមប្រណាំងសរុបចំនួន ៤២ ទូក និងកីឡាកកីឡាការិនីសរុប ចំនួន ១៤៩០នាក់ កីឡាករពេញសិទ្ធិ ចំនួន១០៩៣នាក់ កីឡាករបម្រុង ៣៩៧នាក់ ក្នុងនោះមានកីឡាការិនី ចំនួន ១៦ នាក់ ដែលចែកចេញជាប្រភេទដូចខាងក្រោម ៖ ទូកផ្តាចារ មាន ០៦ទូក ទូកខ្នាតអន្តរជាតិនារី មាន ០២ទូក ទូកខ្នាតអន្តរជាតិបុរសមាន ០៦ទូកទូក(ខ្លី)ប្រពៃណីជាតិ មាន ២៣ទូកទូក(ង)វែងប្រពៃណីជាតិ មាន ០៥ទូក ៕

ប្រភព៖ រដ្ឋបាលខេត្តបាត់ដំបង