(កំពង់ចាម)៖ ឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្តម អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃទី១៣ ខែមេសា ឆ្នាំ ២០២៦ នេះ បានអញ្ជើញដឹកនាំមន្ត្រីរាជការ ប្រារព្ធពិធីក្រុងពាលីសូត្រមន្ត នៅបរិវេណវត្តនគរបាជ័យ ស្ថិតក្នុងឃុំអំពិល ស្រុកកំពង់សៀម ដើម្បីបួងសួងសូមសេចក្តីសុខ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស ២៥៧០ ។

បើតាមមន្ត្រីរដ្ឋបាលខេត្តកំពង់ចាម បានឱ្យដឹងថា ក្រោមការដឹកនាំ របស់ឯកឧត្តម អ៊ុន ចាន់ដា អភិបាលខេត្ត សម្រាប់ឆ្នាំនេះ ខេត្តកំពង់ចាម មានរៀបចំកម្មវិធី សង្ក្រាន្តដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី មានលក្ខណៈប្លែកច្រើនជាងពីឆ្នាំមុន។

ការរៀបចំ ដែលគួរឱ្យកត់សម្គាល់សម្រាប់ «សង្ក្រាន្តកំពង់ចាម» មានការរៀបចំសោភណភាពក្នុងក្រុងកំពង់ចាម ហើយការរៀបចំមានភាពចម្រុះគ្នាជាពិសេសការដាក់តាំងស្តង់ពិពណ៌ តាមដងផ្លូវក្នុងក្រុងកំពង់ចាម និងព្រឹត្តិការណ៍លៀសហាលដែលមានចំនួន ៥ តោនជាដើម ។

លោកក៏បានបញ្ជាក់ទៀតថា ចំពោះព្រឹត្តិការណ៍លៀសហាល ធ្វើឡើងនៅថ្ងៃទី ១៥ ខែមេសា ដែលជាថ្ងៃចូលឆ្នាំទី ២ ជាការទាក់ទាញប្រជាពលរដ្ឋ មកពីទីជិតឆ្ងាយ ចូលរួមពិសារដោយសេរី និងចូលរួមសប្បាយរីករាយទាំងអស់គ្នា នៅក្នុងកម្មវិធីបើកសង្ក្រានឆ្នាំថ្មី កាន់តែមានចំនួនច្រើនជាងឆ្នាំមុន ។

ប្រភព៖ រដ្ឋបាលខេត្តកំពង់ចាម