ពោធិ៍សាត់៖  នៅថ្ងៃទី២៣ ខែឧសភា ឆ្នាំ២០២៥ លោកឧត្តមសេនីយ៍ទោ ស ថេង ស្នងការនគរបាលខេត្តបានដឹកនាំកិច្ចប្រជុំបូកសរុបលទ្ធផលការងារក្សាការពារ សន្តិសុខ សុវត្ថិភាព និងសណ្តាប់ធ្នាប់សង្គមប្រចាំខែឧសភា កិច្ចប្រជុំនេះមានការចូលរួមពីលោក លោកស្រីគណៈស្នងការ លោកនាយការិយាល័យ លោកអធិការនគរបាលស្រុក ក្រុងលោកមេបញ្ជាការវរសេនាតូចការពារព្រំដែនគោកលេខ៨២៥ លោកនាយ នាយរងប៉ុស្តិ៍នគរបាលរដ្ឋបាលចូលរួមផងដែរ ។

ក្រោយពីបានស្តាប់នៃការអានរបាយការណ៍បូកសរុបលទ្ធផលការងារប្រចាំខែឧសភា របស់លោកវរសេនីយ៍ឯក ប៉ូ វណ្ណារ៉ូនាយការិយាល័យសរុបរួចមក លោកឧត្តមសេនីយ៍ទោ ស ថេង បានលើកឡើងពីលទ្ធផលការងារសម្រេចបានក្នុងខែឧសភា និងការខិតខំប្រឹងប្រែងរបស់កងកម្លាំង បំពេញភារកិច្ចការងារ ការពារសុវត្ថិភាពជូនថ្នាក់ដឹកនាំ ដោយយកចិត្តទុកដាក់ ក្រោមការដឹកនាំរបស់លោកស្នងការរងផែនការងារជំនាញ និងលោកអធិការ ទន្ទឹមនឹងការទទួលលទ្ធផលល្អ លោកស្នងការក៏បានជំរុញ តាមបណ្តាអង្គភាពបន្តអនុវត្តផែនការការងារ និងត្រៀមលក្ខណៈ ឆ្លើយតបនឹងការចុះសវនកម្មផ្ទៃក្នុងនាពេលឆាប់ៗខាងមុខនេះ ។

លោកស្នងការបានបញ្ជាក់ថាកងកម្លាំងនគរបាល ត្រូវពង្រឹងអនុវត្តការងារ គោរពវិន័យនិងថែរក្សាតម្លៃកិត្តិយស កេរ្តិ៍ឈ្មោះរបស់នគរបាលជាតិ អធិការដ្ឋាន និងកម្លាំងជំនាញ បន្តការចុះត្រួតពិនិត្យតំបន់សំខាន់ៗ ការអនុវត្តច្បាប់ចរាចរណ៍ផ្លូវគោក និងផ្សព្វផ្សាយប្រជាពលរដ្ឋឱ្យយល់ដឹងពីការប្រើប្រាស់ផ្លូវ និងបញ្ហាគ្រោះធម្មជាតិឱ្យឪពុកម្ដាយឬអាណាព្យាបាល ណែនាំកូនៗជានារីឱ្យមានការយល់ដឹង និងចេះការពារខ្លួន និងការបង្ការខ្លួនពីបទល្មើសផ្សេងៗ ទន្ទឹមនេះត្រូវពង្រឹងការងារសន្តិសុខ បន្តសហការបង្ក្រាប លើករណីគ្រឿងញៀន ក្មេងទំនើង ល្បែងស៊ីសង និងបទល្មើសនេសាទខុសច្បាប់ ជាពិសេសបម្រើសេវាសាធារណៈជូនប្រពលរដ្ឋឱ្យបានទាន់ពេលវេលា ក្នុងឱកាសនេះផងដែរលោកស្នងការក៏បានប្រគល់មធ្យោបាយ ម៉ូតូចំនួនពីរគ្រឿង ជូនដល់អធិការដ្ឋាននគរបាលក្រុងពោធិ៍សាត់ សម្រាប់ប្រើប្រាស់បំពេញតួនាទីភារកិច្ចប្រចាំថ្ងៃ ។

ប្រភព៖ ស្នងការរដ្ឋាននគរបាលខេត្តពោធិ៍សាត់