មណ្ឌលគិរី៖ នៅព្រឹកថ្ងៃទី១០ ខែតុលា ឆ្នាំ២០២៤នេះ លោក ឧត្តម​សេនីយ៍ត្រី ប៉ែន ផល្លី ស្នងការរង ដំ​ណាងលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី បានចូលរួមជាមួយអជ្ញាធរខេត្ត បានរៀបចំយុទ្ធនាការសម្អាតអនាម័យបរិស្ថានក្នុងក្រុងសែនមនោរម្យ ដោយមានការអញ្ជើ​ញ​ចូលរួមពី អភិបាល​រងខេត្តមណ្ឌលគិរី និងមានការចូលរួមពី កងកម្លាំងប្រដាប់អាវុធ ប្រធាន អនុប្រធានមន្ទីរ/អង្គភាពពាក់ព័ន្ធ អាជ្ញាធរក្រុងសែនមនោរម្យ ស.ស​.យ​.ក ព្រមទាំងប្រជាពលរដ្ឋ លោកគ្រូ អ្នកគ្រូ និងសិស្សានុសិស្សជាច្រើននាក់ ចាប់ពីសួនដំរីដែររហូតដល់វិមានឯករាជ្យ ក្នុងក្រុងសែនមនោមរ្យ ខេត្តមណ្ឌលគិរី។

នាឱកាសប្រារព្ធទិវានេះដែរ លោក​ ងិន សុវិមាន អភិបាលរងខេត្តមណ្ឌលគិរី បានឱ្យដឹងថាការប្រារព្ធទិវានេះ ក្នុងគោលបំណងបំផុសស្មារតី និងផ្លាស់ប្តូរឥរិយាបថប្រជាពលរដ្ឋឱ្យចេះស្រលាញ់ ថែរក្សា និងជាពិសេសធ្វើការសម្អាតអនាម័យបរិស្ថាន ការប្រារព្ធទិវានេះ នឹងក្លាយជាចរន្តចលករដែលជំរុញឱ្យមានការផ្តើមធ្វើសកម្មភាពមេត្រីបរិស្ថានចេញពីបុគ្គលម្នាក់ៗក្នុងការចេះទទួលខុសត្រូវ ទុកដាក់កាកសំណល់ដោយមិនបោះចោលពាសវាលពាសកាលនៅតាមទីសាធារណៈ ជាហេតុធ្វើឱ្យប៉ះពាល់ដល់សោភ័ណភាព ក្នុងក្រុងសែនមនោរម្យ និងទូទាំងខេត្ត។ 

លោក អភិបាលរងខេត្ត បានបញ្ជាក់ថា បញ្ហាប្រឈមមួយចំនួន ក្នុងនោះរួមមាន: បញ្ហាសំរាម សំណល់រឹង រាវ នៅតាមទីប្រជុំជន និងទីក្រុង ដែលមានការកើនឡើងយ៉ាងខ្លាំង គួបផ្សំនឹងប្រព័ន្ធគ្រប់គ្រងសំរាមនាពេលបច្ចុប្បន្ននៅមានកម្រិតនៅឡើយ សំណល់សំរាមមួយចំនួន ជាពិសេសសំណល់ប្លាស្ទិក ត្រូវបានពលរដ្ឋខ្លះដុត និងខ្លះបានបោះចូលទៅក្នុងទឹក និងសមុទ្រ បង្កគ្រោះថ្នាក់សម្រាប់ជីវចម្រុះដែលពិភពលោក បាននឹងកំពុងយកចិត្តទុកដាក់។

លោក អភិបាលរងខេត្តលោក​ ងិន សុវិមាន ក៏បានក្រើនរម្លឹក ក៏ដូច​ជាជំរុញឱ្យស្ថាប័នសាធារណៈ និងឯកជន អាជ្ញា​ធរគ្រប់លំដាប់ថ្នាក់ ប្រជាពលរដ្ឋ ចូលរួមធ្វើអនា​ម័យ និងថែរក្សាបរិស្ថានជាប្រចាំនៅតាមមូល​ដ្ឋាន​របស់ខ្លួន ឯកឧត្តម ក៏បានជំរុញឱ្យអាជ្ញាធរមូលដ្ឋាន ជាមួយនឹងស្ថាប័នពាក់ព័ន្ធ ធ្វើការអប់រំផ្សព្វផ្សាយដល់ប្រជាពលរដ្ឋពីការគ្រប់គ្រងទុក​ដាក់សំរាម និងសំណល់រឹងឱ្យបានត្រឹមត្រូវផងដែរ៕

ប្រភព៖ ស្នងការនគរបាលខេត្តមណ្ឌលគិរី