សៀមរាប ៖ នៅរសៀលថ្ងៃចន្ទ ទី១៥ ខែមិថុនា ឆ្នាំ២០២៦ នៅសាលប្រជុំស្នងការដ្ឋាននគរបាលខេត្ត លោកឧត្ដមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានអញ្ជើញជាសហអធិបតី ជាមួយលោកឧត្តមសេនីយ៍ទោ សាយ រិទ្ធីសក្កិ នាយកសាលានគរបាលជាតិភូមិភាគ៤ ក្នុងពិធីប្រគល់-ទទួល សិស្សនាយនគរបាល នាយនគរបាលរង វគ្គបណ្តុះបណ្តាលកម្រិតបឋមវិជ្ជាជីវ:នគរបាល ជំនាន់ទី២០ លើកទី១ ចុះកម្មសិក្សា នៅស្នងការដ្ឋាននគរបាលខេត្តសៀមរាប ដោយមានការអញ្ជើញចូលរួមពី លោកស្នងការរង លោកគ្រូនគរបាលជាតិ លោកនាយការិយាល័យដែលពាក់ព័ន្ធ និងសិស្សនាយនគរបាល នាយនគរបាលរង សរុបចំនួន ៧៦នាក់ ស្រី ១២នាក់ផងដែរ។

ពិធីនេះត្រូវបានរៀបចំឡើងក្នុងគោលបំណងប្រគល់ និងទទួលសិស្សនាយនគរបាល នាយនគរបាលរង ដើម្បីអនុវត្តកម្មសិក្សាការងារជាក់ស្តែងនៅតាមបណ្តាអង្គភាពជំនាញ និងអធិការដ្ឋាននគរបាលក្រុង-ស្រុក សំដៅពង្រឹងសមត្ថភាព ចំណេះដឹង និងបទពិសោធន៍ការងារវិជ្ជាជីវៈនគរបាល ឱ្យស្របតាមតម្រូវការនៃការបំពេញភារកិច្ចជាក់ស្តែង។

ក្នុងឱកាសនោះ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានស្វាគមន៍ និងផ្តាំផ្ញើដល់សិស្សកម្មសិក្សាទាំងអស់ ត្រូវខិតខំរៀនសូត្រ គោរពវិន័យ បទបញ្ជាផ្ទៃក្នុង និងក្រមសីលធម៌វិជ្ជាជីវៈនគរបាល ព្រមទាំងប្រកាន់ខ្ជាប់នូវស្មារតីទទួលខុសត្រូវខ្ពស់ ក្នុងការបំពេញការងារ ដើម្បីទទួលបានចំណេះដឹង និងបទពិសោធន៍ល្អៗ សម្រាប់យកទៅអនុវត្តក្នុងអាជីពជាមន្ត្រីនគរបាលជាតិនាពេលអនាគត៕

ប្រភព៖ ស្នងការដ្ឋាននគរបាលខេត្តសៀមរាប