នាព្រឹកថ្ងៃព្រហស្បតិ៍ ទី២៧​ ខែមីនា ឆ្នាំ២០២៥​ ឯកឧត្ដម​ ឧត្តមសេនីយ៍​ឯក​ បណ្ឌិត​ តុប​ នេត​ អគ្គនាយក​ នៃអគ្គនាយកដ្ឋានអត្តសញ្ញាណកម្ម​ និង​ ឯកឧត្ដម​ ថេន​ សំវិសុទ្ធ​ អគ្គនាយកប្រៃសណីយ៍កម្ពុជា​ បានអញ្ជើញជាសហប្រធានចុះអនុស្សរណៈនៃការយោគយល់ ស្តីពីកិច្ចសហប្រតិបត្តិការ ក្នុងការផ្តល់សេវាប្រៃសណីយ៍ ពាក់ព័ន្ធការងារអត្តសញ្ញាណកម្ម​ ជូនប្រជាពលរដ្ឋ រវាងប្រៃសណីយ៍កម្ពុជា និងអគ្គនាយកដ្ឋានអត្តសញ្ញាណកម្ម។ ពិធីនេះមានការអញ្ជេីញចូលរួមពី​ ឯកឧត្ដម​ អគ្គនាយករង​ លោក លោកស្រី ប្រធាន​ អនុប្រធាននាយកដ្ឋាន​ ចំណុះអគ្គនាយកដ្ឋានអត្តសញ្ញាណកម្ម​ និងប្រៃសណីយ៍កម្ពុជា​ ព្រមទាំង​ សមាជិក​ សមាជិកា​ មន្ត្រី​ពាក់ព័ន្ធ​ជាច្រើន​រូបទៀតផងដែរ។ 

ឯកឧត្ដម​ ឧត្តមសេនីយ៍​ឯក​ បណ្ឌិត​ តុប នេត បាន​សម្តែងនូវ ការស្វាគមន៍យ៉ាងកក់ក្តៅ ចំពោះវត្តមាន ឯកឧត្តម លោកជំទាវ លោក លោកស្រី សមាជិក សមាជិកា​ ដែលបានឆ្លៀតឱកាសដ៏មមាញឹក អញ្ជើញចូលរួមនាថ្ងៃនេះ ដើម្បីអបអរសាទរ ចំពោះការចុះហត្ថលេខាលើអនុស្សរណៈនៃការយោគយល់ (MoU) ដែលមានសារសំខាន់ សម្រាប់ការលើកកម្ពស់ការផ្តល់សេវារដ្ឋបាលលើការងារអត្តសញ្ញាណកម្មជូនប្រជាពលរដ្ឋ ឱ្យមានភាពទូលំ ទូលាយ ងាយស្រួល និងឆាប់រហ័ស។

ឯកឧត្ដម​ ឧត្តមសេនីយ៍ឯក បណ្ឌិត​ ក៏បានរំលឹកផងដែរ ថា អគ្គនាយកដ្ឋានអត្តសញ្ញាណកម្ម ដោយបានទទួលគោលការណ៍ដឹកនាំដ៏ខ្ពង់ខ្ពស់ ពី ឯកឧត្តម​អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការផ្តល់សេវារដ្ឋបាល​លើការងារអត្តសញ្ញាណកម្មជូនប្រជាពលរដ្ឋ ឱ្យមានភាពងាយស្រួល សាមញ្ញ និងឆាប់រហ័ស ហេតុនេះ អនុស្សរណៈនៃការយោគយល់នេះ គឺជាការបោះជំហានដ៏សំខាន់ក្នុងបេសកកម្មរួមគ្នារវាងអគ្គនាយកដ្ឋានអត្តសញ្ញាណកម្ម និងប្រៃសណីយ៍កម្ពុជា ក្នុងការពង្រឹងកិច្ចសហប្រតិបត្តិការរវាងស្ថាប័នរដ្ឋក្នុងការ រួមចំណែកផ្តល់សេវាសាធារណៈជូនប្រជាពលរដ្ឋឱ្យកាន់តែល្អ។

ចុងបញ្ចប់នៃពិធីនេះដែរ ឯកឧត្ដម​ ឧត្តមសេនីយ៍ឯក បណ្ឌិត​ បានយកឱកាសនេះ ថ្លែងអំណរគុណយ៉ាងជ្រាលជ្រៅចំពោះប្រៃសណីយ៍កម្ពុជា ចំពោះកិច្ចសហការដ៏ល្អ និងការចូលរួមជាដៃគូយ៉ាងសកម្ម ក្នុងការផ្តល់សេវាដឹកជញ្ជូនលិខិតឆ្លងដែន និងឯកសារ អត្តសញ្ញាណកម្មដ៏ទៃទៀតជូនប្រជាពលរដ្ឋ។ ក្នុងនោះដែរ ឯកឧត្ដម​ បណ្ឌិត​ ក៏បានណែនាំដល់បណ្តានាយកដ្ឋានចំណុះ អគ្គនាយកដ្ឋានអត្តសញ្ញាណកម្មទាំងអស់ សូមចូលរួមសហការអនុវត្តនូវការប្រើប្រាស់សេវាប្រៃសណីយ៍កម្ពុជា ឱ្យបានទូលំទូលាយស្របតាមខ្លឹមសារនៃអនុស្សរណៈនេះ។

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ