នៅទីស្តីការក្រសួងមហាផ្ទៃ នាព្រឹកថ្ងៃទី១៩ ខែសីហា ឆ្នាំ២០១៩នេះ ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បានទទួលជួបពិភាក្សាការងារជាមួយលោកឧកញ៉ា អ៊ុច សម្បត្តិ ប្រធានសមាគម អ្នកប្រឹក្សាយោបល់គ្រឿងសម្អាង (CCA) ក្នុងគោលបំណង បង្កើនកិច្ចសហប្រតិបត្តិការ លើវិស័យគ្រឿងសម្អាងទាំងការនាំចូល និងកំពុងចរាចរនៅលើទីផ្សារកម្ពុជា។ កិច្ចពិភាក្សានេះដែរ ភាគីទាំងពីរបានឯកភាពគ្នា បង្កើតវគ្គបណ្តុះបណ្តាល និងសិក្ខាសាលាសម្រាប់ ចែករំលែកចំណេះដឹងផ្លូវច្បាប់លើវិស័យគ្រឿងសម្អាង ដោយមានការចូលរួមពីមន្រ្តី និងអ្នកជំនាញពាក់ព័ន្ធផងដែរ។
ក្នុងនោះប្រធានសមាគម (CCA) បានស្នើសុំអ្នកជំនាញពីគណៈកម្មាធិការប្រយុទ្ធប្រឆាំងផលិតផលក្លែងក្លាយ ដើម្បីធ្វើជាវាគ្មិន និងស្នើសុំកម្លាំងសមត្ថកិច្ច ដើម្បីជួយគាំទ្រក្នុងការ ចុះអនុវត្តនីតិវិធីត្រួតពិនិត្យ និងការបង្ក្រាបផលិតផលក្លែងក្លាយ-ខុសច្បាប់។
ជាមួយគ្នានេះ សមាគម ក៏បានជម្រាបជូនអំពីការអនុវត្តកិច្ចការងាររបស់ខ្លួននាពេលកន្លងមក និង សុំអនុសាសន៍ របស់ឯកឧត្តម នាយឧត្តមសេនីយ៍ រដ្ឋលេខាធិការ និងជាប្រធាន គ.ប.ផ.ក ដើម្បីឲ្យសមាគម អាចស្វែងយល់បន្ថែមនូវផលិតផលគ្រឿងសម្អាង, ចំណេះដឹងផ្លូវច្បាប់, ហានិភ័យ, គោលការណ៍នាំចូល, និងជាពិសេសគោលការណ៍បង្កើតរោងចក្រផលិតផលគ្រឿងសម្អាងផលិតក្នុងស្រុកអោយបានច្រើនជាងការនាំចូល។
ទន្ទឹមនឹងនេះដែរ ឯកឧត្តម នាយឧត្តមសេនីយ៍ មៀច សុផាន់ណា បានបញ្ជាក់ថា គ.ប.ផ.ក នឹងប្រយុទ្ធប្រឆាំងដាច់ខាតនូវអាជីវកម្មទាំងឡាយណាដែលក្លែងក្លាយ -ខុសច្បាប់ ដែលធ្វើអោយប៉ះពាល់សុខភាពអ្នកប្រើប្រាស់ ក៏ដូចជាប្រជាពលរដ្ឋ ទាំងមូល ។ ឯកឧត្តមបន្តថា សមាមគមត្រូវជួយចូលរួមផ្សព្វផ្សាយអប់រំដល់ផលិតករ, ការនាំចូល, ស្ដុកទុក, និងចែកចាយ ផលិតផលគ្រឿងសម្អាង តាមបណ្ដាញសង្គមនានា ដែលពុំមានច្បាប់អនុញ្ញាត និងពុំបានឆ្លងកាត់ ការត្រួតពិនិត្យបច្ចេសទេស ត្រឹមត្រូវ សូមស្នើសុំច្បាប់អនុញ្ញាតច្បាប់ពីក្រសួងមានសមត្ថកិច្ច ជាពិសេសសមាគមត្រូវសហការ ជាមួយគណកម្មាធិការ ដើម្បីជួយផ្ដល់ព័ត៌មានផលិតករ ទាំងឡាយណាដែលលួចលក់ ផលិត ចែកចាយគ្រឿងសម្អាងក្លែងក្លាយ-ខុសច្បាប់៕ រតនា
ប្រភព៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ