នាព្រឹកថ្ងៃអង្គារទី២០ ខែសីហា ឆ្នាំ២០១៩ នៅសាលប្រជុំទីស្តីការក្រសួងមហាផ្ទៃ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានរៀបចំកិច្ចប្រជុំអន្តរក្រសួង ឆ្លងសេចក្តីព្រាងផែនការជាតិ ០៥ឆ្នាំ ស្តីពីការត្រួតពិនិត្យគ្រឿងញៀនឆ្នាំ២០១៩-២០២៣ ក្រោមអធិបតីភាព ឯកឧត្តម នាយឧត្តមសេនីយ៏ មាស វិរឹទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន ដោយមានការចូលរួមពីថ្នាក់ដឹកនាំក្រសួង តំណាងក្រុមការងារអន្តរក្រសួងនានា និងតំណាងអង្គភាពជំនាញពាក់ព័ន្ធសរុប៤២រូប។
កិច្ចប្រជុំនេះរៀបចំឡើងក្នុងគោលបំណងបង្កើតជាវេទិកាសម្រាប់ចូលរួមមតិយោបល់ និងបានលើកយកនូវវិធានការយុទ្ធសាស្រ្តសំខាន់ៗនៃសេចក្តីព្រាងផែនការជាតិ០៥ឆ្នាំ មកពិភាក្សាកែសម្រួលនូវ ខ្លឹមសារ វិធានការ ពាក្យបច្ចេកទេស និងយុទ្ធសាស្រ្តផ្សេងៗទៀត។ ជាងនេះទៀតតំណាងអន្តរក្រសួងនានា ក៏បានលើកជាមតិយោបល់រៀងៗខ្លួនដែលពាក់ព័ន្ធជាមួយ និងសមត្ថកិច្ចរបស់ខ្លួន ដើម្បីដាក់ចូលឲ្យស្របជាមួយអង្គភាពរបស់ខ្លួន។ បន្ថែមលើសពីនេះទៀត តំណាងស្ថាប័នដែលបានចូលរួមទាំងអស់ក៏បានស្នើឲ្យមានផែនការផ្សព្វផ្សាយ អបរំ បណ្តុះបណ្តាល តាមមធ្យោបាយផ្សេងៗ ដូចជាតាមរយៈការអប់រំតាមគ្រឹះស្ថានអប់រំសាធារណៈ ប្រព័ន្ធផ្សព្វផ្សាយនានា ដើម្បីស្របតាមសម័យការគ្រប់គ្រងបច្ចេកវិទ្យា(E-Government Management) និងស្នើសុំពង្រឹងកិច្ចសហការឲ្យបានតឹងរឹងផងដែរ៕ រតនា
ដោយ៖ នាយកដ្ឋានព័ត៌មានវិទ្យា
