ថ្ងៃទី៧ ខែតុលា ឆ្នាំ២០១៩ អាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងបរិស្ថានរួមគ្នាបណ្តុះបណ្តាលជនបង្គោលស្តីពីការប្រយុទ្ធប្រឆាំងគ្រឿងញៀនចំនួន១០០នាក់ដែលជាមន្រ្តីរាជការក្រសួង មន្ទីរ បរិស្ថានរាជធានី-ខេត្ត និងឧទ្យានុរក្ស នៅទីស្តីការក្រសួងបរិស្ថាន។
ក្នុងឱកាសនោះ ឯកឧត្តម សាបូ អូហ្សាណូ រដ្ឋលេខាធិការក្រសួងបរិស្ថាន និងជាប្រធានគណកម្មាធិការប្រយុទ្ធប្រឆាំងគ្រឿងញៀនក្រសួងបរិស្ថាន ក្នុងនាម ឯកឧត្តម សាយ សំអាល់
បានមានប្រសាសន៍ថ្លែងអំណរគុណដល់អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនដែលតែងតែផ្តល់កិច្ចសហការយ៉ាងជិតស្និទ្ធចូលរួមរាល់ពិធីផ្សព្វផ្សាយពីគ្រោះថ្នាក់នៃគ្រឿងញៀនពិសេសនៅតាមបណ្តារាជធានី-ខេត្តកន្លងមក និងបានផ្តាំផ្ញេីដល់សិក្ខាកាមទាំងអស់ខិតខំត្រង់ត្រាប់ស្តាប់សិក្សាស្វែងយល់ពីខ្លឹមសាររាល់ប្រធានបទដេីម្បីយកទៅផ្សព្វផ្សាយទៅដល់អ្នកពាក់ព័ន្ធនៅតាមសហគមន៍មូលដ្ឋានសំដៅធ្វេីឲ្យសហគមន៍មានសុវត្ថិភាព។
ក្នុងឱកាសនោះដែរ ក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ឧត្តមសេនីយ៍ឯក ថោង សុគន្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងអំណរគុណដល់ថ្នាក់ដឹកនាំក្រសួងបរិស្ថានដែលរៀបចំវគ្គបណ្តុះបណ្តាលជនបង្គោលនេះឡេីងស្របពេលដែលរាជរដ្ឋាភិបាលបានបន្តធ្វេីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លេីកទី៤ ប្រេីប្រាស់កំលាំងមធ្យោបាយសរុប បង្ការ ទប់ស្កាត់ បង្រ្កាប និងដោះស្រាយបញ្ហាគ្រឿងញៀនបង្កេីតភាពសុខសាន្តជូនប្រជាពលរដ្ឋ។
សូមបញ្ជាក់ថា វគ្គបណ្ដុះបណ្ដាលជនបង្គោលនេះ មានរយ:ពេល៣ថ្ងៃពីថ្ងៃទី០៧ ដល់ថ្ងៃទី០៩ ខែតុលា ឆ្នាំ២០១៩៕
ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន