នៅទីស្តីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី១០ ខែតុលា ឆ្នាំ២០១៩នេះ អគ្គនាយកដ្ឋានរដ្ឋបាល ក្រសួងមហាផ្ទៃ បើកកិច្ចប្រជុំផ្សព្វផ្សាយសេចក្តីណែនាំស្តីពីនីតិវិធី នៃការបោះឆ្នោតជ្រើសរើសប្រធានការិយាល័យប្រជាពលរដ្ឋក្រុង ស្រុក ខណ្ឌ គោលដៅថ្មី ៣២ គោលដៅឆ្នាំ២០១៩ ក្រោមអធិបតីភាព ឯកឧត្តម ស៊ វរិន អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ ដោយមានការចូលរួមពី ថ្នាក់ដឹកនាំ នៃអគ្គនាយកដ្ឋានរដ្ឋបាល អភិបាល អភិបាលរង នាយករដ្ឋបាលក្រុង ស្រុក ខណ្ឌ និងមន្រ្តីពាក់ព័ន្ឋជាច្រើនរូបផងដែរ។
ឯកឧត្តម ឌុក ណារ៉េត ទីប្រឹក្សាក្រសួងមហាផ្ទៃ បានលើកឡើងថា បច្ចុប្បន្នការិយាល័យប្រជាពលរដ្ឋ ត្រូវបានរាជរដ្ឋាភិបាល បង្កើតបន្ថែមបានចំនួន៣២គោលដៅនៅតាមក្រុង ស្រុក ខណ្ឌ សម្រាប់ឆ្នាំ២០១៩នេះ ហើយរាជរដ្ឋាភិបាលក៏មានគោលការណ៍នឹងបន្តពង្រីកការិយាល័យនេះឲ្យមានរហូតដល់រដ្ឋបាលឃុំ សង្កាត់ផងដែរ ដើម្បីឆ្លើយតបនឹងតម្រូវការចាំបាច់របស់ប្រជាពលរដ្ឋនៅក្នុងមូលដ្ឋានរបស់ខ្លួន។
ក្នុងកិច្ចប្រជុំផ្សព្វផ្សាយនេះ ក៏មានការរៀបចំធ្វើបទបង្ហាញ និងឆ្លើយសំនួរដោយវាគ្មិន ចំនួន៣រូបគឺ ឯកឧត្តម ឌុក ណារ៉េត ទីប្រឹក្សាក្រសួងមហាផ្ទៃ លោក នូវ និត ប្រធានការិយាល័យតាមដានត្រួតពិនិត្យ និងវាយតម្លៃ និងលោក បួន ហេង ប្រធាននាយកដ្ឋានមុខងារ និងធនធាន ស្តីពីពីនីតិវិធី នៃការបោះឆ្នោតជ្រើសរើសប្រធានការិយាល័យប្រជាពលរដ្ឋក្រុង ស្រុក ខណ្ឌ និងពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋក្រុង ស្រុក ខណ្ឌ ដើម្បីឲ្យដំណើរការជ្រើសរើស និងការអនុវត្តការងារតួនាទី ភារកិច្ច ក្នុងការិយាល័យប្រជាពលរដ្ឋនេះ ប្រព្រឹត្តទៅដោយត្រឹមត្រូវស្របតាមបែបបទគោលការណ៍ ដែលក្រសួងមហាផ្ទៃបានណែនាំ និងធានាបាននូវប្រសិទ្ឋភាពខ្ពស់ លើនីតិវិធីនៃការជ្រើសរើសប្រធានការិយាល័យប្រជាពលរដ្ឋ នៅតាមក្រុម ស្រុក ខណ្ឌ។
សូមជម្រាបថា រាជរដ្ឋាភិបាលកម្ពុជា បានបង្កើតការិយាល័យប្រជាពលរដ្ឋ នៅរដ្ឋបាលថ្នាក់ក្រោមជាតិ ក្នុងគោលបំណងដើម្បីដោះស្រាយនូវបញ្ហាប្រឈមនានារបស់ប្រជាពលរដ្ឋនៅមូលដ្ឋានប្រកបដោយអព្យាក្រឹត្យភាព ដែលមិនស្ថិតនៅក្រោមការគ្រប់គ្រងរបស់គណៈភិបាលក្រុង ស្រុក ខណ្ឌទេ គឺស្ថិតក្រោមការគ្រប់គ្រងរបស់ក្រុមប្រឹក្សាក្រុង ស្រុក ខណ្ឌវិញ។ ការិយាល័យប្រជាពលរដ្ឋមានតួនាទីភារកិច្ចរួមមាន៖ ១.ទទួលបណ្តឹងនៅក្នុងដែនសមត្ថកិច្ច, ២.សម្រាំង វាយតម្លៃបណ្តឹងដែលទទួលបាន, ៣.បញ្ជូនបណ្តឹងមិនស្ថិតក្នុងសមត្ថកិច្ចទៅស្ថាប័នពាក់ព័ន្ធ, ៤.ចាត់វិធានការស៊ើបអង្កេត និងលើកអនុសាសន៍អំពីវិធានការដោះស្រាយ និងតាមដានការអនុវត្តវិធានការដោះស្រាយ, ៥.ផ្តល់ព័ត៌មានត្រឡប់អំពីលទ្ធផលនៃការដោះស្រាយបណ្តឹង, ៦.រៀបចំផែនការសកម្មភាព ថវិកា និងរបាយការណ៍៕ រតនា
ដោយ៖ នាយកដ្ឋានព័ត៌មានវិទ្យា