ព្រឹកថ្ងៃសុក្រ ទី១៧ ខែមករា ឆ្នាំ២០២០ ឯកឧត្តម អ៉ីវ លាង អគ្គាធិការ នៃអគ្គាធិការដ្ឋាន អញ្ជើញដឹកនាំ កិច្ចប្រជុំពិភាក្សាស្តីពី សេចក្តីព្រាងផែនការយុទ្ធសាស្រ្តរយៈពេល៥ឆ្នាំ(២០២០-២០២៤) របស់អគ្គាធិការដ្ឋាន។
ផែនការយុទ្ធសាស្រ្តនេះ ជាផែនទីបង្ហាញផ្លូវមួយក្នុងការអនុវត្តតួនាទី ភារកិច្ចរបស់ខ្លួនសម្រាប់រយៈពេល ៥ឆ្នាំពីឆ្នាំ២០២០-២០២៤ ដោយបានកំណត់នូវចក្ខុវិស័យ បេសកកម្ម គោលបំណង គោលដៅ និងយុទ្ធសាស្ត្ររបស់ខ្លួនយ៉ាងច្បាស់លាស់។ ការរៀបចំផែនការយុទ្ធសាស្ត្រនេះ មានមូលដ្ឋានផ្អែកលើយុទ្ធសាស្ត្រចតុកោណដំណាក់កាលទី៤ ផែនការយុទ្ធសាស្រ្តអភិវឌ្ឍជាតិឆ្នាំ២០១៩ -២០២៣ កម្មវិធីនយោបាយនានារបស់រាជរដ្ឋាភិបាលនីតិកាលទី៦ នៃរដ្ឋសភា និងរបស់ក្រសួងមហាផ្ទៃ ព្រមទាំងស្របតាមការកំណត់តួនាទី ភារកិច្ចរបស់ខ្លួនផងដែរ។ តាមរយៈផែនការយុទ្ធសាស្រ្តនេះ អគ្គាធិការដ្ឋាននឹងចូលរួមចំណែកក្នុងដំណើរការកំណែទម្រង់នានារបស់រាជរដ្ឋាភិបាល និងរបស់ក្រសួងមហាផ្ទៃ សំដៅលើកកម្ពស់ជីវភាពរស់នៅរបស់ប្រជាពលរដ្ឋ និងការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ជាពិសេស រួមចំណែកក្នុងការពង្រឹងតួនាទីភារកិច្ច ប្រតិបត្តិការការងាររបស់មន្ត្រីនៅថ្នាក់ជាតិ និងថ្នាក់ក្រោមជាតិក្នុងដែនសមត្ថកិច្ចក្រសួងមហាផ្ទៃ ឱ្យកាន់តែមានប្រសិទ្ធភាព តម្លាភាព និងគណនេយ្យភាព។
កិច្ចប្រជុំនេះប្រព្រឹត្តទៅ នៅសាលប្រជុំរបស់អគ្គាធិការដ្ឋាន និងមានការអញ្ជើញចូលរួមពី ឯកឧត្តម លោកជំទាវ អគ្គាធិការរង ប្រធាននាយកដ្ឋាន និងអនុប្រធាននាយកដ្ឋាន៕
ប្រភព៖ អគ្គាធិការដ្ឋាន