នារសៀលថ្ងៃច័ន្ទ ៥រោច ខែមាឃ ឆ្នាំរកា ព.ស ២៥៦១ ត្រូវនឹងថ្ងៃទី០៥ ខែកុម្ភៈ ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន បានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៧ និងលើកទិសដៅការងារឆ្នាំ២០១៨ របស់ អ.ជ.ប.គ.ញ និងកិច្ចប្រជុំបូកសរុបលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ ឆ្នាំ២០១៨។ កិច្ចប្រជុំសន្និបាតនេះ រៀបចំឡើងដោយ អាជ្ញាធរជាតិប្រយុទ្ធប្រឆាំងគ្រឿងញៀន ដែលមានរយៈពេលមួយថ្ងៃពេញ ។
ប្រធានគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន បានឡើងធ្វើបទអន្តរាគមន៍លើការងារព្យាបាល និងស្តារនីតិសម្បទាអ្នកញៀនគ្រឿងញៀន ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានមានមតិស្វាគមន៍ និងរាយការណ៍នូវសកម្មភាព និងស្ថានភាពប្រជុំសន្និបាតគោរពជូន សម្តេចក្រហោម តំណាងដ៏ខ្ពង់ខ្ពស់សម្តេចតេជោនាយករដ្ឋមន្ត្រី ជ្រាប និងបានសំណូមពរដល់សម្តេចនូវចំណុចដូចខាងក្រោម៖
១. សំណើសុំឱ្យមានបន្តជាលើកទី៣ នូវយុទ្ធនាការប្រយុទ្ធប្រឆាំងគ្រឿងញៀនក្នុងឆ្នាំ២០១៨
២. ណែនាំថ្នាក់រាជធានីខេត្ត បង្កើតគណៈកម្មាធិការ(ជាសំណើ) ក្នុងការពង្រឹងការព្យាបាលអ្នកញៀនគ្រឿងញៀននៅតាមថ្នាក់មូលដ្ឋានបន្ថែមទៀត
៣. យោងតាមមាត្រា១០០ នៃជំពូក៦ នៃច្បាប់ស្តីពី “គ្រឿងញៀន” ក្នុងការព្យាបាលអ្នកញៀនជាបន្ទុករបស់រដ្ឋ ដូច្នេះសុំឱ្យមានប័ណ្ណសមធម៌ដល់អ្នកញៀនថ្នាំដើម្បីព្យាបាលនិងស្តារនីតិសម្បទាដោយពុំគិតថ្លៃ
៤. ស្នើឱ្យមន្ត្រីបច្ចេកទេសបន្ថែមទៀតនៅក្រុងបាវិត
៥. ស្នើសុំឱ្យសាលាជំរះក្តីគ្រប់ជាន់ថ្នាក់ពន្លឿននីតិវិធីក្នុងការជំរះក្តីនៃអ្នកញៀនគ្រឿងញៀន ដើម្បីចាត់ចែងទ្រព្យសម្បត្តិទៅតាមនីតិវិធីហិរញ្ញវត្ថុ
៦. ស្នើក្រសួងយុត្តិធម៌ជួយពិនិត្យ សិក្សាវាយតម្លៃ នូវទ្រព្យសម្បត្តិ ដើម្បីជៀសវាងការខូចខាត
ក្នុងឱកាសសន្និបាតនេះផងដែរ សម្តេចក្រឡាហោម បានថ្លែងសុន្ទរកថា ដោយសោមនស្សរីករាយ ដែលបានចូលរួមជាមួយឯកឧត្តម លោកជំទាវ លោក លោកស្រី ក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៧ និងលើកទិសដៅការងារឆ្នាំ២០១៨ របស់អាជ្ញាធរជាតិប្រយុទ្ធប្រឆាំងគ្រឿងញៀន(អ.ជ.ប.គ.ញ) ព្រមជាមួយការបិទកិច្ចប្រជុំបូកសរុបលទ្ធផលការងារអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ របស់រាជរដ្ឋាភិបាលនាពេលនេះ។ ក្នុងនាមរាជរដ្ឋាភិបាល និងខ្លួនសម្តេចផ្ទាល់ សូមសម្តែងនូវការអបអរសាទរចំពោះលទ្ធផលនៃអង្គសន្និបាត និងសូមកោតសរសើរដោយស្មោះចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់ នៃអាជ្ញាធរជាតិប្រយុទ្ធប្រឆាំងគ្រឿងញៀន លេខាធិការដ្ឋាននៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ក៏ដូចជាថ្នាក់ដឹកនាំ និងមន្ត្រីនៃក្រសួង ស្ថាប័ន អង្គភាណសមាជិក និងគនៈកម្មាធិការត្រួតពិនិត្យ គ្រឿងញៀនរាជធានី ខេត្ត ព្រមទាំងកម្លាំងអនុវត្តច្បាប់គ្រប់ប្រភេទ ទាំងថ្នាក់ជាតិ និងថ្នាក់ក្រោមជាតិ ដែលបានខិតខំប្រឹងប្រែងយកចិត្តទុកដាក់ប្រកបដោយការទទួលខុសត្រូវខ្ពស់ អនុវត្តនូវរាល់ទិសដៅដែលបានដាក់ចេញកាលពីឆ្នាំ២០១៦កន្លងទៅ ជាពិសេសបានអនុវត្តប្រកបដោយប្រសិទ្ធភាពនូវបទបញ្ជាលេខ០១ ស្តីពីការពង្រឹងវិធានការប្រយុទ្ធប្រឆាំងគ្រឿងញៀន និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ របស់រាជរដ្ឋាភិបាល ក្នុងរយៈពេល០១ឆ្នាំ២០១៧កន្លងទៅ រហូតសម្រេចបានលទ្ធផលជាច្រើនគួរជាទីមោទកភាព និងសូមគាំទ្រទាំងស្រុងរាល់ទិសដៅដែលអង្គសន្និបាតបានដាក់ចេញសម្រាប់ការអនុវត្តក្នុងឆ្នាំ២០១៨នេះ។ ជាការពិត លទ្ធផលទាំងនេះ គឺពិតជាមិនអាចកាត់ផ្តាច់បានពីការចូលរួមនិងគាំទ្រយ៉ាងសកម្មផុសផុលពីគ្រប់សមាសសភាពនៃសង្គម និងស្ថាប័នពាក់ព័ន្ធទាំងអស់។
ក្នុងនាមរដ្ឋាភិបាល សម្តេចក៏បានធ្វើការណែនាំចំពោះអាជ្ញាធរជាតិប្រយុទ្ធប្រឆាំងគ្រឿងញៀន ក្រសួង ស្ថាប័ន អង្គភាព គណៈកម្មាធិការត្រួតពិនិត្យគ្រឿងញៀនរាជធានី ខេត្ត និងគ្រប់ផ្នែកពាក់ព័ន្ធទាំងអស់ដូចតទៅ៖
១. គ្រប់ក្រសួង ស្ថាប័ន អង្គភាព គណៈកម្មាធិការត្រួតពិនិត្យគ្រឿងញៀនរាជធានី ខេត្ត ដែលជាសមាជិកអាជ្ញាធរជាតិប្រយុទ្ធប្រឆាំងគ្រឿងញៀន ត្រូវចាត់ទុកបញ្ហាគ្រឿងញៀនជាបញ្ហាអាទិភាព ត្រូវដោះស្រាយ និងបន្តគោលដៅសម្រាប់ឆ្នាំ២០១៨ ក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣ របស់រាជរដ្ឋាភិបាល
២.ចំពោះការងារផ្សព្វផ្សាយអប់រំពីបញ្ហាគ្រឿងញៀន ក្រសួង ស្ថាប័ន អង្គភាព គណៈកម្មាធិការត្រួតពិនិត្យគ្រឿងញៀនរាជធានី ខេត្ត ត្រូវបន្តសកម្មភាពឱ្យបានកាន់តែសកម្ម និងផុសផុលថែមទៀត ដោយបន្តពង្រឹង និងពង្រីកកិច្ចសហការ ដើម្បីផ្សព្វផ្សាយឱ្យបានទូលាយអំពីច្បាប់ និងផលប៉ះពាល់នៃគ្រឿងញៀន។
៣.ចំពោះការងារព្យាបាល និងស្តារនីតិសម្បទា អាជ្ញាធរជាតិ ពិសេសគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន ត្រូវបង្កើនការយកចិត្តទុកដាក់បន្ថែមទៀតលើកិច្ចការសំខាន់ៗ ដូចជា សេវាព្យាបាល និងស្តានីតិសម្បទា នៅតាមមណ្ឌលសុខភាព មន្ទីរពេទ្យបង្អែក និងមណ្ឌលបណ្តោះអាសន្នទាំងរដ្ឋនិងឯកជនឱ្យបានល្អបំផុត
៤.ចំពោះការងារអនុវត្តច្បាប់ គ្រប់អង្គភាពពាក់ព័ន្ធត្រូវបង្កើនការយកចិត្តទុកដាក់ធ្វើសកម្មភាពឱ្យកាន់តែសកម្មបន្ថែមទៀត ក្នុងការប្រមូលព័ត៌មាន ស្រាវជ្រាវ ដើម្បីបង្ការ ទប់ស្កាត់ និងបង្រ្កាបបទល្មើសគ្រឿងញៀនឱ្យកាន់ទេមានប្រសិទ្ធភាព ពិសេសការចរាចរគ្រឿងញៀនឆ្លងប្រទេសតែម្តង
៥. ចំពោះក្រសួងយុត្តិធម៌ ត្រូវបន្តខិតខំជម្រុញស្ថាប័នអយ្យការ និងតុលាការគ្រប់ជាន់ថ្នាក់ ពន្លឿននីតិវិធីនៃការកាត់ក្តីបទល្មើសគ្រឿងញៀន ដើម្បីឱ្យអាជ្ញាធរជាតិប្រយុទ្ធប្រឆាំងគ្រឿងញៀនមានលទ្ធភាពប្រើប្រាស់ស្របតាមគោលការណ៍ច្បាប់ និងស្ថានភាពជាក់ស្តែងនាពេលបច្ចុប្បន្ន
៦. ចំពោះគណៈកម្មាធិការត្រួតពិនិត្យគ្រឿងញៀនរាជធានី ខេត្ត ត្រូវបន្តយកចិត្តទុកដាក់អនុវត្តឱ្យមានប្រសិទ្ធភាពនូវបទបញ្ជាលេខ០១ ស្តីពីការពង្រឹងវិធានការប្រយុទ្ធប្រឆាំងគ្រឿងញៀន គោលនយោបាយ “ភូមិឃុំមានសុវត្ថិភាព” ព្រមទាំងផែនការផ្សេងៗ
៧. ត្រូវយកចិត្តទុកដាក់ពង្រឹង និងពង្រីកបន្ថែមនូវកិច្ចសហប្រតិបត្តិការអន្តរជាតិ ទាំងក្របខណ្ធទ្វេភាគី ពហុភាគី ក្នុងតំបន់ និងអន្តរជាតិ ពិសេសជម្រុញឱ្យមានកិច្ចព្រមព្រៀង ស្តីពីការត្រួតពិនិត្យគ្រឿងញៀនឆ្លងកាត់ព្រំដែន ដើម្បីឈានដល់ការកសាងភូមិ ស គ្មានគ្រឿងញៀន
៨. អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន ត្រូវបន្តកិច្ចសហការជាមួយសមភាគី ថៃ ឡាវ និងវៀតណាម ដើម្បីកសាងភូមិ ស គ្មានគ្រឿងញៀន
៩. ដើម្បីរក្សាសមិទ្ធផលនេះ លេខាធិការដ្ឋាននៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ត្រូវរៀបចំលិខិតស្នើសុំទៅរាជរដ្ឋាភិបាល បន្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣ ជាបន្តទៀត។
ជាទីបញ្ចប់ ជាមួយនិងការប្រកាសបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៧ និងលើកទិសដៅការងារឆ្នាំ២០១៨ របស់អាជ្ញាធរជាតិប្រយុទ្ធប្រឆាំងគ្រឿងញៀន ព្រមជាមួយនិងការបិទកិច្ចប្រជុំបូកសរុបលទ្ធផលការងារអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ របស់រាជរដ្ឋាភិបាលនាពេលនេះ សម្តេចក្រឡាហោម បានជូនពរឯកឧត្តម លោកជំទាវ លោក លោកស្រីទាំងអស់ ជួបតែនឹងពុទ្ធពរទាំង០៤ ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕