នៅព្រឹកថ្ងៃពុធ ៧កើត ខែផល្គុន ឆ្នាំរកា ព.ស ២៥៦១ ត្រូវនឹងថ្ងៃទី២១ ខែកុម្ភៈ ឆ្នាំ២០១៨ នៅសាលមហោស្រពកោះពេជ្រ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញជាអធិបតីដ៏ខ្ពង់ខ្ពស់ ក្នុងកម្មវិធីបើកសន្និសីទជាតិ ស្តីពី កំណែទម្រង់វិមជ្ឍការ និងវិសហមជ្ឈការ “មេរៀនបទពិសោធន៍ បញ្ញាប្រឈម និងចក្ខុវិស័យទៅអនាគត” ។ សន្និសីទនេះដែរ គឺមានការអញ្ជើញចូលរួមពីក្រសួង ស្ថាប័ន អង្គការនានា និងមន្ត្រីថ្នាក់ជាតិ ក្រោមជាតិ ជាច្រើនរូប។
ក្នុងឱកាសនេះដែរ សម្តេចក្រឡាហោម បានមានមតិសំណេះសំណាល និងបានធ្វើសុន្ទរកថាបើកស្និសិទជាតិថា សន្និសីទនេះ មានគោលបំណងបីគឺ៖
១.ការផ្សព្វផ្សាយ និងការណែនាំអនុវត្តផែនការសកម្មភាព និងថវិកាឆ្នាំ២០១៨របស់គ.ជ.អ.ប និងផែនការអនុវត្តបីឆ្នាំ ដំណាក់កាលចុងក្រោយនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
២. ការរួមគ្នាពិនិត្យមើលឡើងវិញ នូវលទ្ធផល មេរៀន បទពិសោធន៍ដែលយើងទទួលបាននៃផែនការកំណែទម្រង់ជិតពីរសតវត្សរ៍កន្លងមក ព្រមទាំងពិនិត្យវាយតម្លៃបញ្ហាប្រឈម និងការពិភាក្សាកំណត់វិធីដោះស្រាយនូវបញ្ហាប្រឈមទាំងនោះ ដើម្បីជម្រុញនៃកិច្ចដំណើរការកំណែទម្រង់ដ៏មានសារៈសំខាន់នេះ ឱ្យបោះជំហានទៅមុខបន្តទៀត។
៣. ការរួមគ្នាកំណត់ពីពហុវិស័យនៃការកំណែទម្រង់ក្នុងដំណាក់កាលនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដើម្បីពង្រឹងការប្តេជ្ញាចិត្ត នយោបាយ និងការឆ្ពោះទៅសម្រេចបាននូវសមិទ្ធផលធំចម្បងៗ ក្នុងសមាសភាពនានា ក្នុងការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
សម្តេចក្រឡាហោម បានបន្តទៀតថា ដើម្បីសម្រេចនូវភាពជោគជ័យ និងមានប្រសិទ្ធភាពខ្ពស់ អង្គសន្និសីទទាំងមូលត្រូវខិតខំពិភាក្សាដោយការយកចិត្តទុកដាក់លើបញ្ហាទាំងនេះ ព្រោះយើងមានរយៈពេលពីពីរថ្ងៃក្នុងការសិក្សាស្វែងរកវិធី ក៏ដូចជាដំណោះស្រាយផ្សេងៗក្នុងការដោះស្រាយបញ្ហាប្រឈមនានាដែលកើតមានឡើង និងស្វែងរកគំនិតល្អៗក្នុងការអនុវត្តការឱ្យបានទទួលជោគជ័យក្នុងឆ្នាំ២០១៨នេះ និងទទួលបានលទ្ធផលរំពឹងទុកច្រើនជាងឆ្នាំកន្លងទៅ។
ជាចុងបញ្ចាប់ សម្តេចក្រឡាហោម បានថ្លែងអំណរគុណចំពោះទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឯកឧត្តម លោកជំទាវ មន្រ្តីគ្រប់ជាន់ថ្នាក់ទាំងអស់ និងបណ្តាអង្គការសង្គមស៊ីវិល ដែលផ្តល់ការគាំទ្រក្នុងវិស័យនេះ ឱ្យជួបតែពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ព្រមទាំងប្រកាសបើកសន្និសីទជាតិ ស្តីពី កំណែទម្រង់វិមជ្ឍការ និងវិសហមជ្ឈការ “មេរៀនបទពិសោធន៍ បញ្ញាប្រឈម និងចក្ខុវិស័យទៅអនាគត” ចាប់ពីពេលនេះតទៅ៕