នៅព្រឹកថ្ងៃអង្គារ ១២រោច ខែផល្គុន ឆ្នាំរកា ព.ស ២៥៦១ ត្រូវនឹងថ្ងៃទី១៣ ខែមីនា ឆ្នាំ២០១៨ នៅទីស្តីការក្រសួងមហាផ្ទៃ ឯកឧត្តម ទួន ស៊ីផាន់ ប្រធានក្រុមការងារបច្ចេកទេស បានដឹកនាំកិច្ចប្រជុំក្រុមការងារលើកទី៣ ដើម្បីពិភាក្សាលើសេចក្តីព្រាងច្បាប់ស្តីពីអន្តោប្រវេសន៍និងលិខិតបទដ្ឋានគតិយុត្តពាក់ព័ន្ធ។ ក្នុងកិច្ចប្រជុំពិភាក្សានេះដែរ គឺក្នុងគោលបំណង ដើម្បីធ្វើការកែសម្រួលខ្លឹមសារ និងកាត់បន្ថយមាត្រា លើមាត្រាទី៧ និងទី១០ នៃច្បាប់ស្តីពីអន្តោប្រវេសន៍។
សូមបញ្ជាក់ផងដែរថា ច្បាប់នេះបង្កើតឡើង មានគោលបំណងក្នុងការគ្រប់គ្រងជនបរទេសគ្រប់រូបដែលមករស់នៅក្នុងព្រះរាជាណាចក្រកម្ពុជា ទាំងទេសចរណ៍ ប្រកបមុខរបរ ឬមកធ្វើការងារ ឱ្យគោរពច្បាប់ ពិសេសបង្ការ និងទប់ស្កាត់អំពើភេវរកម្ម ឧក្រឹត្យកម្មឆ្លងដែន និងបទល្មើសផ្សេងៗទៀត ដែលបង្កឡើងដោយជនបរទេស ដើម្បីរួមចំណែកបង្កើនចំណូលថវិកាជាតិ និងងាយស្រួលក្នុងកិច្ចសហប្រតិបត្តិការអន្តរជាតិពាក់ព័ន្ធនឹងកិច្ចការអន្តោប្រវេសន៍។