នៅរសៀល ថ្ងៃចន្ទ ៨កើត ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៧ ខែកញ្ញា ឆ្នាំ២០១៨ នាទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតអោយប្រតិភូសមាគម អា វីអេហ្ស កម្ពុជា-ចិន ដែលដឹកនាំដោយ លោក ស្រេង ហៀង ចូលជួបសម្តែងការគួរសម។
លោក ស្រេង ហៀង តំណាងអោយសមាគម អា វីអេហ្ស កម្ពុជា-ចិន បានជំរាបជូនសម្តេចក្រឡាហោមថា សមាគមនេះបង្កើតឡើងក្នុងគោលបំណងគាំពារលើវិស័យសុខាភិបាលនៅកម្ពុជា ជាពិសេសលើសុខភាពស្រ្តី ហើយជាក់ស្តែងបច្ចុប្បន្ន កម្ពុជាកំពុងស្ថិតក្នុងភូមិសាស្ត្រដែលមានភាពអំណោយផល សម្រាប់ទាក់ទាញភ្ញៀវទេសចរមក ទស្សនាតំបន់ទេសចរណ៍ជាច្រើន ហើយជាមួយការមកទស្សនានៅកម្ពុជានេះ ភ្ញៀវទេសចរទាំងនោះក៏អាចពិនិត្យ និងព្យាបាលព្រមគ្នា ដែលបច្ចុប្បន្នសេវានេះកំពុងពេញនិយមនៅប្រទេសមួយចំនួនរួមមាន ម៉ាឡេស៊ី និងថៃ ដែលពួកគេនិយមហៅថា ទេសចរណ៍សុខាភិបាល។ លោកបានជំរាបបន្តថា តាមរយៈគម្រោងផែនការ សម្រាប់ការផ្តល់កញ្ចប់សេវាសុខាភិបាលនេះដែរ ក៏ជាផ្នែកមួយក្នុងការជួយទាក់ទាញទេសចរពីបណ្តាលប្រទេសជាច្រើនក្នុងតំបន់អាស៊ាន ជាពិសេសប្រទេសចិន កូរ៉េ និងជប៉ុនជាដើម។ បន្ថែមលើសពីនេះសមាគមក៏បាននាំមកនូវអង្កចំនួន៥០តោនជូនដល់សម្តេចក្រឡាហោម ដើម្បីបែងចែកដល់ប្រជាពលរដ្ឋដែលកំពុងរងគ្រោះដោយសារគ្រោះទឹកជំនន់ផងដែរ។
ជាការឆ្លើយតប សម្តេចក្រឡាហោម ស ខេង បានគាំទ្រទាំងស្រុងចំពោះការបង្កើតអោយមានការផ្តល់សេវាសុខភាពដល់ស្រ្តីតាមរយៈសមាគមនេះ ដោយសម្តេចបានលើកឡើងថា ពីមួយឆ្នាំទៅមួយឆ្នាំប្រជាពលរដ្ឋកម្ពុជាជាច្រើនបានចេញទៅពិនិត្យ និងព្យាបាលជំងឺនៅប្រទេសជិតខាង ហើយប្រសិនគម្រោងនេះទទួលបានជោគជ័យ នឹងអាចជួយកាត់បន្ថយការចំណាយរបស់ប្រជាពលរដ្ឋយើងផង និងក៏ជាផ្នែកមួយសម្រាប់កំណើនសេដ្ឋកិច្ចផងដែរ។ ទន្ទឹមនឹងការគាំទ្រនេះដែរ សម្តេចក្រឡាហោមបានស្នើរអោយសមាគម ត្រូវឈរលើកត្តាសំខាន់ពីរគឺ ១- ត្រូវប្រើប្រាស់ឧបករណ៍តាមបច្ចេកវិទ្យាទំនើប, និងទី២- វិជ្ជាជីវៈរបស់បុគ្គលិកបំពេញការងារផ្តល់សេវាផ្ទាល់គឺត្រូវមានគុណភាព។
ជាចុងបញ្ចប់ សម្តេចក្រឡាហោមបានគូសបញ្ជាក់ដែរថា ចំពោះអង្ករ៥០តោន ដែលសមាគមជូនសម្តេចនាពេលនេះ នឹងរៀបចំផ្តល់ជូនប្រជាពលរដ្ឋជួបការលំបាកតាមស្ថានភាពជាក់ស្តែង និងអោយបានទាន់ពេលវេលា៕
ដោយ៖ នាយកដ្ឋានព័ត៌មានវិទ្យា