នាព្រឹកថ្ងៃសៅរ៍ ១២រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៦ ខែតុលា ឆ្នាំ២០១៨ សម្តេចក្រឡា ហោម ស ខេង នាយករដ្ឋមន្ត្រីស្តីទី និងលោកជំទាវ ព្រមទាំងក្រុមគ្រួសារ ថ្នាក់ដឹកនាំមន្ត្រីរាជការស៊ីវិល និងថ្នាក់ដឹកនាំមន្ត្រីនគរបាលជាតិ នៃក្រសួងមហាផ្ទៃ អញ្ជើញចូលរួមបុណ្យកាន់បិណ្ឌវេនទី១២ នៅវត្តមុនីប្រសិទ្ធិវង្ស ស្ថិតក្នុងភូមិព្រែក ព្នៅ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
បន្ទាប់ពីជួបជុំពុទ្ធបរិស័ទបងប្អូនញាតិមិត្តជិតឆ្ងាយ ធ្វើបទនមស្ការ ព្រះរតនត្រ័យ សមាទានសីល ព្រះសង្ឃចម្រើនព្រះបរិត្ត ទៅតាមទំនៀមទម្លាប់ប្រពៃណីព្រះពុទ្ធសាសនារួចមក សម្តេចក្រឡាហោម និងលោកជំទាវ ព្រមទាំងថ្នាក់ដឹកនាំក្រសួង មហាផ្ទៃទាំងអស់ និងពុទ្ធបរិស័ទ បានអញ្ជើញរាប់បាត្រ បង្សុកូល ប្រគេនទេយ្យវត្ថុដល់ព្រះសង្ឃ ដើម្បីឧទ្ទិស មគ្គផល កុសលផលបុណ្យ ជូនដល់វិញ្ញាណក្ខ័ន្ធ អ្នកមានគុណ បុព្វការីជន និងយុទ្ធជន យុទ្ធនារី នគរបាលជាតិទាំងអស់ ដែលបានពលី ចំពោះបុព្វហេតុជាតិ មាតុភូមិ។
ក្នុងឱកាសនោះដែរ សម្តេចក្រឡាហោម និងលោកជំទាវ ក៏បាននាំយកបច្ច័យរបស់សម្តេចផ្ទាល់ រួមជាមួយបច្ច័យរបស់ថ្នាក់ ដឹកនាំ មន្ត្រីរាជការស៊ីវិល និងថ្នាក់ដឹកនាំមន្ត្រីនគរបាលជាតិទាំងអស់សរុបចំនួន ៤២,២៧៥,០០០រៀល, ប្រាក់ដុល្លារចំនួន ៦,៨៦០$ សរុបទាំងអស់ចំនួន ៦៩,៧១៥,០០០រៀល, អង្ករចំនួន ៣៥០គីឡូក្រាម, ទឹកសុទ្ធ ៣០កេស ,ទឹកក្រូច ៣០កេស, មី ៥កេសធំ, ត្រីខកំប៉ុង ៣កេសធំ, ទឹកដោះគោ ៣កេសធំ, ស្ករស ៥០គីឡូក្រាម សម្រាប់វេរប្រគេនព្រះសង្ឍគង់ក្នុងវត្តមុនីប្រសិទ្ធិវង្ស ផងដែរ។
សូមបញ្ជាក់ដែរថា សម្រាប់វត្តមុនីប្រសិទ្ធិវង្ស ដែលសម្តេចក្រឡាហោម និងលោកជំទាវ បានអញ្ជើញចូលរួមវេនកាន់ បិណ្ឌទី១២នេះ គឺជាវត្តទី០៣ហើយ ក្នុងរដូវបុណ្យភ្ជុំបិណ្យឆ្នាំនេះ៕ គឹមអាន
ដោយ៖ នាយកដ្ឋានព័ត៌មានវិទ្យា
