ក្នុងជំនួបរវាង សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ជាមួយលោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា នៅរសៀលថ្ងៃទី០៧ ខែវិច្ឆិកា ឆ្នាំ២០១៨ម្សិលមិញនេះ នាទីស្តីការក្រសួងមហាផ្ទៃ សម្ដេចក្រឡាហោម ស ខេង មានប្រសាសន៍ថា រាជរដ្ឋភិបាលកម្ពុជា បានបង្កើតក្រុមការងារមួយ ដើម្បីដោះស្រាយបញ្ហាប្រឈមផ្សេងៗ ក៏ដូចជាផ្សារភ្ជាប់ភាពជាដៃគូរ និងការធ្វើការងារជាមួយគ្នា របស់អង្គការសង្គមស៊ីវិល ដែលជាក្ដីបារម្ភ និងមតិមួយចំនួនលើកឡើងកន្លងមក ហើយជាងនេះទៅទៀតនៅពេលមានបញ្ហាអ្វីអង្គការសង្គមស៊ីវិល ទាំងនោះ អាចដាក់ជាសំណួរ និងមតិផ្សេងៗបានផងដែរ។ សម្តេចក្រឡាហោមបន្ថែមថា រាជរដ្ឋាភិបាលកម្ពុជា តាមរយៈក្រសួងមហាផ្ទៃ ជាសេនាធិការ ខិតខំយកចិត្តទុកដាក់ ដើម្បីលុបបំបាត់នូវចំណុចអសកម្មផ្សេងៗ ដែលបានបង្កើតឲ្យមានយន្ដការច្រកចេញចូលតែមួយនៅគ្រប់រាជធានី-ខេត្ត ក្នុងទិសដៅផ្ដល់សេវាឲ្យកាន់តែជិតប្រជាពលរដ្ឋ និងបានកាន់តែឆាប់រហ័ស ហើយប្រកបដោយតម្លាភាព។ ការិយាល័យច្រកចេញចូលតែមួយនេះ ក៏មានកន្លែងទទួលពាក្យបណ្ដឹងប្រជាពលរដ្ឋ ដើម្បីដោះស្រាយ អ្វីដែលជាចំណុចអសកម្មនៅក្នុងការផ្ដល់សេវា ជូនប្រជាពលរដ្ឋនៅថ្នាក់មូលដ្ឋានផងដែរ។
លោកស្រី រ៉ូណាស្មីត សម្ដែងនូវការរីករាយចំពោះគំនិតផ្ដួចផ្ដើមរបស់រាជរដ្ឋាភិបាលកម្ពុជា ក្នុងការបង្កើនឲ្យមានការផ្សារភ្ជាប់ភាពជាដៃគូ ជាមួយអង្គការ សង្គមស៊ីវិល និងNGOs តាមរយៈការបង្កើតនូវវេទិកា ដើម្បីចូលរួមក្នុងការអភិវឌ្ឍន៍សង្គមកម្ពុជា។ លោកស្រី រ៉ូណា ស្មីត ក៏បានសម្ដែងនូវការអបអរសាទរ និងលើកទឹកចិត្តឲ្យរាជរដ្ឋាភិបាល ក៏ដូចជាក្រសួងមហាផ្ទៃ បន្ដ ពង្រឹងបង្កើតបន្ថែមនូវការិយាល័យច្រកចេញចូលតែមួយដើម្បីបម្រើប្រជាពលរដ្ឋឲ្យកាន់តែងាយស្រួល និងបង្ខិតសេវាសាធារណអោយកាន់តែជិតប្រជាពលរដ្ឋ៕ គឹមអាន
ប្រភព៖ នាយកដ្ឋានព័ត៌មានវិទ្យា
