ក្នុងជំនួបសម្តែងការគួរសម រវាង សម្តេចក្រឡាហោម ស ខេង និងឯកឧត្តម Sudirman Haseng
ឯកអគ្គរដ្ឋទូតថ្មីរបស់ប្រទេសឥណ្ឌូនេស៊ី នៅរសៀលថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ព.ស២៥៦២ត្រូវនឹងថ្ងៃទី០៧ ខែវិច្ឆិកា ឆ្នាំ២០១៨ម្សិលមិញនេះ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី ក្រសួងមហាផ្ទៃ មានប្រសាសន៍ថា ទំនាក់ទំនងដ៏យូរឡុងរវាងកម្ពុជា និងឥណ្ឌូនេស៊ី នឹងរឹតតែមានភាពល្អប្រសើរថែមទៀតតាមរយៈទំនាក់ទំនងសហប្រតិបត្តិការការងារលើផ្នែកសន្តិសុខ ដូចជាការជួញដូរគ្រឿងញៀន បទល្មើសឆ្លងដែនជាដើម។ សម្តេចបន្ថែមថា ការកំណែទម្រង់រដ្ឋបាលថ្នាក់ក្រោមជាតិ ក៏ជាផ្នែកមួយដែលប្រទេសទាំងពីរអាចផ្លាស់ប្តូរបទពិសោធន៍ និងបង្កើតកិច្ចសហប្រតិបត្តិការកាន់តែជិតស្និតរវាងក្រសួងមហាផ្ទៃ និងស្ថាប័នពាក់ព័ន្ធរបស់ឥណ្ឌូនេស៊ីផងដែរ។ ដោយឡែកសម្តេច ក្រឡាហោម គាំទ្រ និងសហការៀបចំឲ្យមានសកម្មភាពនានាសម្រាប់អបអរនៅក្នុងខួបគម្រប់៦០ឆ្នាំនៃការបង្កើតទំនាក់ទំនងការទូតកម្ពុជា-ឥណ្ឌូនេស៊ី ជាងនេះទៅទៀតនឹងបន្តជួយដោះស្រាយរាល់បញ្ហាផ្សេងៗ របស់ស្ថានទូតឥណ្ឌូនេស៊ីនៅកម្ពុជាផងដែរ។ បន្ថែមលើសពីនេះ សម្តេចក្រឡាហោម បានចូលរួមរំលែកមរណទុកចំពោះពលរដ្ឋឥណ្ឌូនេស៊ីដែលបានជួបនៅព្យុះស៊ូណាម៉ីកកាលពីកន្លងទៅថ្មីនេះ និងចូលរួមរំលែកទុកចំពោះក្រុមគ្រួសារដែលជួបឧបទ្ទវហេតុធ្លាក់យន្តហោះនៅឥណ្ឌូនេស៊ីនាពេលថ្មីៗនេះផងដែរ។
ក្នុងនោះផងដែរ ឯកឧត្តម Sudirman Haseng ក៏បានថ្លែងអំណរគុណដល់ក្រសួងមហាផ្ទៃកម្ពុជាដែលកន្លងមកតែងតែជួយដោះស្រាយបញ្ហាពាក់ពន្ធ័ជាមួយ នឹងពលរដ្ឋឥណ្ឌូនេស៊ី បានសមស្របនិងទាន់ពេលវេលា។ ឯកឧត្តម Sudirman Haseng ឯកអគ្គរដ្ឋទូតឥណ្ឌូនេស៊ី នឹងបង្កើតនូវសកម្មភាពផ្សេងៗដើម្បីអបអររំលឹកខួបគម្រប់៦០ឆ្នាំនៃការបង្កើតទំនាក់ទំនងការទូតរវាងប្រទេសទាំងពីរនៅឆ្នាំក្រោយ ដោយសកម្មភាពទាំងនោះគឺ ឥណ្ឌូនេស៊ីចង់ឲ្យពលរដ្ឋ និងអ្នកវិនិយោគឥណ្ឌូនេស៊ីនៅកម្ពុជា បានទៅទស្សនកិច្ចស្វែងយល់ នៅសាលាមួយដែលបានសាងសង់នៅខេត្តព្រៃវែង ដែលមានឈ្មោះថាសាលាមិត្តភាពកម្ពុជាឥណ្ឌូនេស៊ី៕ គឹមអាន
ប្រភព៖ នាយកដ្ឋានព័ត៌មានវិទ្យា
