ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានលើកឡើងថា ក្នុងឆ្នាំ២០១៨ កន្លងទៅនេះ កងកម្លាំងនគរបាលជាតិ នៅតែរក្សាបាន ស្ថានភាពសន្តិសុខជាតិ មានលក្ខណៈល្អប្រសើរ ខណៈដែលស្ថានការណ៍ក្នុងតំបន់មួយចំនួន ក៏ដូចជានៅលើពិភពលោកបាននឹងកំពុងប្រឈមបញ្ហាសន្តិសុខ និងបញ្ហាមួយចំនួនជាច្រើនទៀតផងដែរ ជាក់ស្តែងប្រទេសកម្ពុជាបញ្ជៀសបាននូវអំពើភេរវកម្មស្របពេលដែលភេរវកម្មលើពិភពលោកកើនឡើង ៧៣លើក លើ៥៤ប្រទេស។
ឯកឧត្តម នាយឧត្តមសេនីយ៍ បានគូសបញ្ជាក់ដូច្នេះនៅក្នុងពិធីបើកសន្និបាតបូកសរុបវាយតម្លៃសភាពការណ៍ និងលទ្ធផលកិច្ចប្រតិបត្តិការឆ្នាំ២០១៨ របស់អគ្គស្នងការដ្ឋាននគរបាលជាតិ និងផ្សព្វផ្សាយទិសដៅរបស់ក្រសួងមហាផ្ទៃឆ្នាំ២០១៩ នៅ ព្រឹកថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២១ ខែកុម្ភៈ ឆ្នាំ២០១៩នេះ នាទីស្តីការក្រសួងមហាផ្ទៃ។
ឯកឧត្តម នាយឧត្តមសេនីយ៍ បានមានប្រសាសន៍បន្ថែមថា ព្រឹត្តិការណ៍នានា វេទិកាជាតិ និងអន្តរជាតិជាង ៨០០០លើក ត្រូវបានរក្សាការពារនូវសុវត្ថិភាពទាំងស្រុង ជាពិសេស ការបោះឆ្នោតព្រឹទ្ធសភានីតិកាលទី៤ និងការបោះឆ្នោតជ្រើសរើសតំណាងរាស្ត្រអាណត្តិទី៦ ពិធីបុណ្យជាតិជាច្រើន និងកម្មវិធីសម្ពោធផ្សេងៗ សុទ្ធតែប្រព្រឹត្តទៅប្រកបដោយជោគជ័យទាំងស្រុង។ ឯកឧត្តម បន្តថា កងកម្លាំងនគរបាលជាតិ បានទប់ស្កាត់ និងបង្រ្កាបទាន់ពេលវេលានូវក្រុមប្រដាប់អាវុធខុសច្បាប់ ដែលបានប៉ុនប៉ងធ្វើសកម្មភាពផ្តួលរំលំរាជរដ្ឋាភិបាលស្របច្បាប់ ដោយបានធ្វើការចាប់ឃាត់ខ្លួនជនសង្ស័យ១៣នាក់ និងរឹបអូសអាវុធ៣០ដើមផងដែរ។ ឯកឧត្តម នាយឧត្តមសេនីយ៍ សន្តិបណ្ឌិត បានបញ្ជាក់បន្ថែមថា សកម្មភាពទាំងនេះគឺបញ្ជាក់ពីសក្ខីភាព សមត្ថភាពរបស់កងកម្លាំងនគរបាលជាតិ ក្នុងកិច្ចសហប្រតិបត្តិការ ស្រាវជ្រាវស៊ើបអង្កេត និងបង្រ្កាបជនល្មើសយកមកផ្តន្ទាទោស ដើម្បីផ្តល់យុត្តិធម៌ដល់ជនរងគ្រោះ និងបង្កើនភាពកក់ក្តៅជូនដល់ប្រជាពលរដ្ឋ៕ គឹមអាន
ដោយ៖ នាយកដ្ឋានព័ត៌មានវិទ្យា