ក្រសួងមហាផ្ទៃ បានជំរុញដល់អង្គការក្រៅរដ្ឋាភិបាល និងសង្គមស៊ីវិលលើកយកបញ្ហាប្រឈមដែលកំពុងជួបប្រទះ ក៏ដូចជាក្តីកង្វល់នានា យកមកដោះស្រាយរួមគ្នា ដើម្បីឲ្យរាជរដ្ឋាភិបាល និងសង្គមស៊ីវិលកាន់តែយល់ច្បាស់គ្នា និងទទួលបានផលប្រយោជន៍រួមគ្នាផងដែរ។ ក្នុងជំនួបរវាងសម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ជាមួយលោកស្រី Rhona Smith អ្នករាយការណ៍ពិសេសរបស់ អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា នៅទីស្ដីការក្រសួងមហាផ្ទៃ នារសៀលថ្ងៃពុធ ០៥កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៨ ខែឧសភា ឆ្នាំ២០១៩។
ឯកឧត្តម ផាត សុផានិត អ្នកនាំពាក្យរងក្រសួងមហាផ្ទៃ បានមានប្រសាសន៍ថា ដើម្បីជំរុញដល់ការលើកកម្ពស់ទំនាក់ទំនង និងភាពជាដៃគូររវាងអង្គការក្រៅរដ្ឋាភិបាល និងសង្គមស៊ីវិល ជាមួយរាជរដ្ឋាភិបាល យើងបានដាក់ចេញនូវយន្តការវេទិកាជួបគ្នាចំនួន ២ ដងក្នុងមួយឆ្នាំ រវាងរាជរដ្ឋាភិបាល និងអង្គការក្រៅរដ្ឋាភិបាល និងសង្គមស៊ីវិល ដែលនេះគឺជាបើកឱ្យមានការចូលរួមផ្ដល់មតិយោបល់ បញ្ហាប្រឈមនានា យកមកដោះស្រាយ ដើម្បីជាប្រយោជន៍ទាំងអស់គ្នាក្នុងការបំពេញភារកិច្ចប្រកបដោយប្រសិទ្ធិភាព ដែលវេទិការនេះគឺធ្វើឡើងក្នុងខែមករា និងខែកក្កដា៕ គឹមអាន
ដោយ៖ នាយកដ្ឋានព័ត៌មានវិទ្យា