នៅព្រឹកថ្ងៃព្រហស្បតិ៍ ១៣កេីត ខែពិសាខ ឆ្នាំកុរ ព.ស២៥៦២ ត្រូវនឹងថ្ងៃទី១៦ ខែឧសភា ឆ្នាំ២០១៩ នាទីស្តីការក្រសួង ក្រសួងមហាផ្ទៃ បានប្រារព្ធពិធីអបអរសាទរខួបអនុស្សាវរីយ៍លេីកទី ៧៤ នៃថ្ងៃបង្កេីតកងកម្លាំងនគរបាលជាតិ (១៦ឧសភា១៩៤៥-១៦ឧសភា២០១៩) ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា និងមានការចូលរួមពីថ្នាក់ដឹកនាំមន្រ្តីនគរបាលជាតិគ្រប់ជាន់ថ្នាក់ផងដែរ។
គួររំលឹកថា កងកម្លាំងនគរបាលជាតិត្រូវបានបង្កេីតឡេីងក្រោម ស្នាព្រះហស្តរបស់ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ ដេីម្បីរក្សា សន្តិសុខសណ្ដាប់ធ្នាប់ សាធារណៈ និង សុវត្ថិភាពសង្គម ការពារ សុវត្ថិភាព សណ្ដាប់ធ្នាប់ នៃសកម្មភាព បាតុកម្ម – កូដកម្ម បញ្ចៀស នូវរាល់ សកម្មភាព ភេរវកម្ម ទប់ស្កាត់ ឧក្រិដ្ឋកម្ម ឆ្លង ដែន ការពារ រាជរដ្ឋាភិបាល ស្របច្បាប់ ការពារ បាវនាជាតិ ជាតិ សាសនា ព្រះមហាក្សត្រ ការពារ រដ្ឋធម្មនុញ ។
គោលបំណងសំខាន់ក្នុងរៀបចំ ថ្ងៃបង្កើតកងកម្លាំងនគរបាលជាតិ គឹទី១-ដើម្បីផ្សព្វផ្សាយដល់មតិជាតិ អន្តរជាតិ និងកងកម្លាំងនគរបាលជាតិទូទាំងប្រទេសឲ្យបានដឹងអំពីថ្ងៃបង្កើតកើតឡើងរបស់នគរបាលជាតិ។ ទី២- គឺដើម្បីស្រាវជ្រាវយកមកផ្សព្វផ្សាយនូវប្រវត្តិសកម្មភាព សមិទ្ធផល ស្នាដៃរបស់កងកម្លាំងនគរបាលជាតិដែលបានបង្កើតឡើងតាមដំណាក់កាលនីមួយៗ ដើម្បីបុព្វហេតុជាតិ សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម។ ទី៣- បំផុសឲ្យមានមនសិការជាតិ បង្ហាញអំពីគំរូវីរភាពអង់អាចក្លាហានរបស់រៀមច្បងជំនាន់មុន ដែលមានភាពស្មោះត្រង់ និងស្មារតីមោះមុតក្នុងជួរកងកម្លាំងនគរបាលជាតិ ដើម្បីឲ្យនគរបាលជំនាន់ក្រោយយកគំរូតាមផងដែរ និងក្នុងគោលដៅលើកកំពស់ប្រសិទ្ធភាពការងារផង រួមចំណែកយ៉ាងសកម្មក្នុងការកសាងប្រទេសជាតិផង។
ក្នុងឆ្នាំ ២០១៨ កន្លងទៅនគរបាលជាតិ បានបង្កើតនូវស្នាដៃ និងសមិទ្ធផលធំៗជាច្រើនលើកិច្ចការបំពេញភារកិច្ចបម្រើឲ្យសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ដែលក្នុងនោះកងកម្លាំងនគរបាលជាតិបានបញ្ជៀសបាននូវសកម្មភាពភារវកម្ម ខណៈដែលឆ្នាំ ២០១៨ កន្លងទៅសកម្មភាពភារវកម្ម បានកើតឡើង ៧៣ លើកលើ ៥៤ ប្រទេស ប៉ុន្តែប្រទេសកម្ពុជាបានការពារដោយពុំអោយកើតមានឡើយ និងទប់ស្កាត់បានការប៉ុនប៉ង ញោះញុង បង្កើតបដិវត្តន៍ពណ៌ក្នុងបំណងផ្ដួលរំលំរដ្ឋាភិបាលស្របច្បាប់ និងបានរៀបចំរបៀបរៀបរយចំពោះបញ្ហាបាតុកម្មកូដកម្មដែលមានចំនួនជាង ១៥០០ លើកផងដែរ ជាពិសេសជាងនេះទៅទៀតកងកម្លាំងនគរបាលជាតិគឺសម្រេចបាននូវកិច្ចការគ្រប់គោលដៅទាំងអស់រួមមាននយោបាយ ការទូត វប្បធម៌ វិនិយោគិន និងទេសចរណ៍ដែលមានគោលដៅក្នុងប្រទេសកម្ពុជាផងដែរ។
សូមបញ្ជាក់ថា ក្រសួងមហាផ្ទៃនឹងរៀបចំប្រព្រឹត្តនេះធំជាងមុនដោយមានការ តាំងពិព័រណ៍ នូវរូបថត អនុស្សាវរីយ៍ជាច្រើននៃសកម្មភាព របស់នគរបាលគ្រប់រាជធានី - ខេត្ត និងនាយកដ្ឋាន នានាដែល ចំណុះឲ្យក្រសួងមហាផ្ទៃ និងអគ្គស្នងការ នគរបាលជាតិផងដែរ៕ គឹមអាន
ដោយ៖ នាយកដ្ឋានព័ត៌មានវិទ្យា