តាកែវ ៖ ក្នុងបរិយាកាសដ៏សប្បាយរីករាយនៃទិវាបុណ្យ ចូលឆ្នាំថ្មី ប្រពៃណីជាតិខ្មែរ នាព្រឹកថ្ងៃអង្គារ ៥កើត ខែចេត្រ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៤ ខែមេសា ឆ្នាំ២០២៦ នេះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានដឹកនាំថ្នាក់ដឹកនាំ និងមន្ត្រីរាជការ រៀបចំពិធីអុជទៀនធូបបូជាគ្រឿងសក្ការៈ ដើម្បីទទួលស្វាគមន៍ទេវតាឆ្នាំថ្មី ព្រះនាម មនោរាទេវី ដែលនឹងចុះមកគ្រប់គ្រងជតារាសីក្នុងឆ្នាំថ្មីនេះ។

ពិធីនេះត្រូវបានរៀបចំឡើងយ៉ាងអធិកអធមនៅបរិវេណសួនច្បារមាត់បឹងតាកែវ ដែលជាបេះដូងនៃក្រុងដូនកែវ។ ក្នុងឱកាសដ៏វិសេសវិសាលនេះ ឯកឧត្តមអភិបាលខេត្ត ក៏បានឧទ្ទិសបួងសួងដល់បារមីវត្ថុស័ក្តិសិទ្ធិក្នុងលោក ជាពិសេសទេវតាឆ្នាំថ្មី សូមមេត្តាជួយបីបាច់ថែរក្សា និងប្រោះព្រំសព្វសាធុការពរជ័យ ជូនដល់បងប្អូនប្រជាពលរដ្ឋក្នុងខេត្តតាកែវ និងទូទាំងប្រទេស សូមឱ្យជួបតែសេចក្តីសុខសុភមង្គល និងមានសុខភាពល្អបរិបូរណ៍។ជាពិសេសវីរកងទ័ពដែលកំពុងឈរជើងការពារបូរណភាពទឹកដីនៅតាមបន្ទាត់ព្រំដែន សូមឱ្យមានកម្លាំងខ្លាំងក្លា និងជោគជ័យគ្រប់ភារកិច្ច។

ឆ្លៀតក្នុងឱកាសនេះ រដ្ឋបាលខេត្តតាកែវ ក៏សូមអំពាវនាវដល់បងប្អូនប្រជាពលរដ្ឋ និងភ្ញៀវទេសចរជាតិ-អន្តរជាតិ មកចូលរួមកម្សាន្តសប្បាយក្នុងកម្មវិធី «សង្ក្រាន្តតាកែវ» ឱ្យបានច្រើនកុះករ និងសូមប្រកបដោយស្មារតីយោគយល់អធ្យាស្រ័យខ្ពស់ក្នុងការធ្វើដំណើរ៕

ប្រភព ៖ រដ្ឋបាលខេត្តតាកែវ