ខេត្តក្រចេះ៖ រដ្ឋបាលខេត្តក្រចេះសូមជម្រាបជូនសាធារណជន និងប្រជាពលរដ្ឋដែល ចូលទន្ទ្រានកាន់កាប់ដោយខុសច្បាប់លើទីតាំងដីក្រុមហ៊ុនកាម៉ាដេនូ វេនឈ័រ (ខេមបូឌា) លីមីធីត និងក្រុមហ៊ុន អិន ខេ អេហ្គ្រី (ខេមបូឌា) លីមីធីត ស្ថិតនៅឃុំកោះខ្ញែរ ឃុំសណ្តាន់ ស្រុកសំបូរ និងឃុំអូរគ្រៀង ឃុំក្បាលដំរី ស្រុកអូរគ្រៀងសែនជ័យ ក្រុមហ៊ុន បានទទួលសិទ្ធិវិនិយោគដីសម្បទានសេដ្ឋកិច្ចពីរាជរដ្ឋាភិបាលនៅឆ្នាំ២០០៩ និងឆ្នាំ២០១០ និងបានចុះបញ្ជីជាដីឯកជនរបស់រដ្ឋ ចេញវិញ្ញាបនបត្រសម្គាល់អចលនវត្ថុនៅក្នុងឆ្នាំ២០១០ និងឆ្នាំ២០១៣ និងបានធ្វើការកាត់ឆ្វៀលចេញនូវដីព្រៃរក្សាទុក ដីទ្រនាប់អូរ ដីសាធារណៈផ្សេងៗ និងដីដែលប្រជាពលរដ្ឋ បានអាស្រ័យផលចេញរួចរាល់។

រដ្ឋបាលខេត្តក្រចេះ សូមធ្វើការបដិសេធ និងប្រកាសមិនទទួលស្គាល់ចំពោះប្រជាពលរដ្ឋដែលកំពុងកាន់កាប់លើទីតាំងដីក្រុមហ៊ុន ដោយខុសច្បាប់ និងសូមប្រកាសបិទបញ្ចប់សំណុំរឿង មិនលើកយកមកធ្វើការដោះស្រាយបន្តឡើយ។ ជាមួយគ្នានេះ ប្រសិនជាបងប្អូនប្រជាពលរដ្ឋដែលកាន់កាប់ដីខុសច្បាប់ខាងលើ ពុំមានដីពិតប្រាកដមែន សូមបងប្អូនប្រជាពលរដ្ឋដាក់ពាក្យស្នើសុំដីសម្បទានសង្គមកិច្ច តាមរយៈរដ្ឋបាលឃុំ ស្រុក ជូនគណៈកម្មាធិការគ្រប់គ្រងដីរដ្ឋថ្នាក់ខេត្ត៕

ប្រភព៖ រដ្ឋបាលខេត្តក្រចេះ