សៀមរាប ៖ នៅព្រឹកថ្ងៃពុធ ទី២៩ ខែមេសា ឆ្នាំ២០២៦ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានអញ្ជើញជាអធិបតី ក្នុងពិធីផ្សព្វផ្សាយគោលនយោបាយ ភូមិ ឃុំ-សង្កាត់ មានសុវត្ថិភាព ប្រគេន និងជូន ព្រះសង្ឃ អាចារ្យ តាជី យាយជី និងពុទ្ធបរិស័ទ នៃវត្តព្រះឥន្ទទេពខាងត្បូងប្រាសាទបាយ័ន ខេត្តសៀមរាប។

កម្មវិធីនេះមានគោលបំណងបង្កើនការយល់ដឹង អំពីសារៈសំខាន់នៃសន្តិសុខ សុវត្ថិភាព សណ្តាប់ធ្នាប់សាធារណៈ ការបង្ការ និងទប់ស្កាត់បទល្មើសគ្រប់ប្រភេទ ជាពិសេសបទល្មើសគ្រឿងញៀន ល្បែងស៊ីសង អំពើហិង្សា និងផលប៉ះពាល់នៃគ្រោះថ្នាក់ចរាចរណ៍។

ក្នុងនោះផងដែរ លោកឧត្តមសេនីយ៍ទោ ស្នងការ ក៏បានលើកទឹកចិត្តឱ្យព្រះសង្ឃ អាចារ្យ និងពុទ្ធបរិស័ទ ចូលរួមផ្សព្វផ្សាយអប់រំ ដឹកនាំផ្លូវចិត្ត និងជំរុញឱ្យប្រជាពលរដ្ឋ មានការយល់ដឹង និងគោរពច្បាប់ រស់នៅតាមគន្លងសីលធម៌ និងវប្បធម៌ល្អប្រពៃ និងជួយបន្តជំរុញការអនុវត្តគោលនយោបាយនេះ នៅក្នុងមូលដ្ឋាន ដែលជាការចូលរួមយ៉ាងសកម្មក្នុងការកសាងសង្គមមួយដែលមានសុខសន្តិភាព ស្ថិរភាព និងការរស់នៅប្រកបដោយសុវត្ថិភាព និងការអភិវឌ្ឍប្រកបដោយចីរភាព៕

ប្រភព៖ ស្នងការដ្ឋាននគរបាលខេត្តសៀមរាប