ខេត្តត្បូងឃ្មុំ៖ ឯកឧត្តម ឡុង ធាម ប្រធានក្រុមប្រឹក្សាខេត្ត និង ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានអញ្ជើញជាអធិបតី បើកកិច្ចប្រជុំសាមញ្ញលើកទី១០ អាណត្តិទី៤ របស់ក្រុមប្រឹក្សាខេត្តត្បូងឃ្មុំ ដើម្បីពិនិត្យនិងអនុម័តលើរបាយការណ៍រីកចម្រើនរបស់ខេត្ត នាព្រឹកថ្ងៃព្រហស្បតិ៍ ទី០៦ ខែមីនា ឆ្នាំ២០២៥នេះ។ 

កិច្ចប្រជុំនេះ បានប្រារព្ធធ្វើឡើងនៅសាលប្រជុំ (ក) សាលាខេត្តត្បូងឃ្មុំ ក៏មានការអញ្ជើញចូលរួមពី ឯកឧត្តម អភិបាលរងខេត្ត នាយក/នាយករងរដ្ឋបាលខេត្ត ប្រធាន/អនុប្រធាន មន្ទីរ/អង្គភាពជុំវិញខេត្ត តំណាងសាលាតំបូងខេត្ត នាយក/នាយករងរដ្ឋបាល នាយក/នាយករង ទីចាត់ការនៃរដ្ឋបាលខេត្ត ព្រមទាំងអ្នកដែលពាក់ព័ន្ធជាច្រើនរូបផងដែរ។ 

ថ្លែងដឹកនាំកិច្ចប្រជុំ ឯកឧត្តម ឡុង ធាម ប្រធានក្រុមប្រឹក្សាខេត្តត្បូងឃ្មុំ បានមានប្រសាសន៍ថា៖ កិច្ចប្រជុំនាពេលនេះ ពិតជាមានសារៈសំខាន់ចំពោះ ការតាក់តែងនូវឯកសារសម្រាប់កិច្ចប្រជុំ ពិសេសគឺធ្វើឡើងដើម្បីស្វែងរកនូវចំនុចខ្វះខាត ដោយសមាជិកដែលចូលរួមទាំងអស់ បានលើកឡើងក្នុងអង្គប្រជុំ ធ្វើយ៉ាងណាកែលម្អអោយកាន់តែប្រសើរឡើង សម្រាប់ទុកជាឯកសារដ៍ល្អទាំងអក្ខរាវិរុទ្ធ ឃ្លោងឃ្លា និងខ្លឹមសារពោរពេញដោយអត្ថន័យ ស្របទៅនឹងឯកសារគំរូច្បាប់ដើម។

ឯកឧត្តម បានកោតសរសើចំពោះកិច្ចខំប្រឹងប្រែងរបស់ថ្នាក់ដឹកនាំ មន្ត្រីរាជការ អាជ្ញាធរក្រុង/ស្រុក និងមូលដ្ឋាន ក្នុងការបំពេញភារកិច្ចការងារប្រកបដោយការទទួលខុសត្រូវខ្ពស់ ជាពិសេសក្រោមការដឹកនាំរបស់ឯកឧត្តម ប៉ែន កុសល្យ អភិបាលនៃគណៈអភិបាលខេត្ត បានធ្វើឱ្យខេត្តមានការអភិវឌ្ឍ មានសន្តិសុខសណ្តាប់ធ្នាប់ល្អ និងមានការទទួលស្គាល់ពីសំណាក់ប្រជាពលរដ្ឋទូទៅនៅមូលដ្ឋាន។

ជាមួយគ្នានេះ ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ បានណែនាំដល់គណៈបញ្ជាការឯកភាពរដ្ឋបាលខេត្ត/ក្រុង/ស្រុក ត្រូវពង្រឹងសន្តិសុខ សុខសុវត្ថិភាព សណ្តាប់ធ្នាប់សាធារណៈ ក្នុងការត្រៀមទទួលថ្នាក់ដឹកនាំជាតិ និងអន្តរជាតិសំខាន់ៗ អញ្ជើញមកលេងកម្សាន្តនិងចូលរួមសម្ដែងការគួរសម អបអរសាទរក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខនេះ។

ឯកឧត្តម អភិបាលខេត្ត ក៏បានផ្ដាំផ្ញើដល់មន្ទីរពាក់ព័ន្ធជុំវិញខេត្ត កងកម្លាំងទាំង៣ប្រភេទ គណៈកម្មការទទួលបន្ទុករៀបចំផែនការសកម្មភាព ត្រូវយកចិត្តទុកដាក់ឱ្យបានខ្ពស់ចំពោះបញ្ហាសន្តិសុខ សណ្ដាប់ធ្នាប់សាធារណៈ សុខសុវត្ថិភាព ជូនដល់បងប្អូនប្រជាពលរដ្ឋ ដែលចូលរួមឱ្យប្រព្រឹត្តការណ៍ដ៏សំខាន់នេះ ទៅដោយរលូនទទួលបានសុវត្ថិភាពខ្ពស់។ ម្យ៉ាងទៀត ត្រូវបំផុសការផ្សព្វផ្សាយក្នុងការថែរក្សាវប្បធម៌ជាតិ និងបង្កភាពសប្បាយរីករាយ ជូនប្រជាពលរដ្ឋនៅទូទាំងខេត្ត តាមរយៈការបង្កើតឱ្យការលេងល្បែងប្រជាប្រិយខ្មែរ និងកម្មវិធីសង្ក្រាន្តទៅតាមតំបន់កម្សាន្ត តំបន់រដ្ឋបាលខេត្ត/ស្រុក/ក្រុង/មន្ទីរ/អង្គភាព ស្ថាប័ននិងតាមភូមិ/ឃុំ/សង្កាត់នានាជាដើម។

គូសបញ្ជាក់ថា៖ កិច្ចប្រជុំសាមញ្ញលើកទី១០ អាណត្តិទី៤ របស់ក្រុមប្រឹក្សាខេត្តត្បូងឃ្មុំ មានរបៀបវារៈចំនួន៤ រួមមាន ៖ ១ -ពិនិត្យ និងអនុម័តលើសេចក្តីព្រាងកំណត់ហេតុ នៃកិច្ចប្រជុំសាមញ្ញលើកទី៩ អាណត្តិទី៤ របស់ក្រុមប្រឹក្សាខេត្ត ២-ពិនិត្យ ពិភាក្សា និងអនុម័តលើសេចក្តីព្រាងរបាយការណ៍រីកចម្រើនប្រចាំខែកុម្ភៈ ឆ្នាំ២០២៥ របស់រដ្ឋបាលខេត្ត ៣ -ពិនិត្យ ពិភាក្សានិងអនុម័តលើសេចក្តីព្រាងផែនការអភិវឌ្ឍន៍រយៈពេលប្រាំឆ្នាំ (២០២៥-២០២៩) សម្រាប់អាណត្តិទី៤ របស់ក្រុមប្រឹក្សាខេត្ត ៤-បញ្ហាផ្សេងៗ (ស្តាប់របាយការណ៍របស់គណៈកម្មាធិការនានា របស់ក្រុមប្រឹក្សាខេត្ត)៕

ប្រភព៖ រដ្ឋបាលខេត្តត្បូងឃ្មុំ