ពោធិ៍សាត់៖ ឯកឧត្ដម ខូយ រីដា អភិបាលខេត្តពោធិ៍សាត់ បានអញ្ជើញចុះពិនិត្យស្ថានភាពទឹកស្ទឹងពោធិ៍សាត់ នៃប្រឡាយក្បាលហុង ក្នុងភូមិសាស្ត្រឃុំវាល ឃុំកោះជុំ ឃុំស្វាយលួង ស្រុកកណ្តៀង និងសង្កាត់ផ្ទះព្រៃ ក្រុងពោធិ៍សាត់ ដែលប្រជាពលរដ្ឋកំពុងជួបប្រទះការខ្វះខាតទឹកស្រោចស្រពដំណាំស្រូវ នារសៀលថ្ងៃទី២០ ខែកក្កដា ឆ្នាំ២០២៦ ដើម្បីដោះស្រាយការលំបាកចំពោះមុខនេះ ឯកឧត្តមអភិបាលខេត្ត បានបញ្ជាឱ្យមន្ទីរធនធានទឹក និងឧតុនិយមខេត្ត ដាក់ម៉ាស៊ីនបូមទឹកចំនួន ២គ្រឿង ដើម្បីអន្តរាគមន៍បូមទឹកជួយសង្គ្រោះស្រូវរបស់ប្រជាពលរដ្ឋភ្លាមៗ ដោយមានការចូលរួមសហការពីអាជ្ញាធរស្រុក ឃុំ និងប្រជាពលរដ្ឋនៅក្នុងមូលដ្ឋានផងដែរ៕

រដ្ឋបាលខេត្តពោធិ៍សាត់ សូមជម្រាបជូនដំណឹងដល់បងប្អូនប្រជាពលរដ្ឋទូទាំងខេត្តពោធិ៍សាត់ ឱ្យបានជ្រាបថា ក្នុងដំណាក់កាលដែលបងប្អូនប្រជាកសិករកំពុងជួបបញ្ហាគ្រោះរាំងស្ងួត ហើយធ្វើឱ្យប៉ះពាល់ដល់ស្រែ ចំការ ជាពិសេសដំណាំស្រូវរបស់បងប្អូននោះ រដ្ឋបាលខេត្តបាន និងកំពុងដោះស្រាយដោយយកចិត្តទុកដាក់ជាទីបំផុត ក្នុងការអន្តរាគមន៍ បើកទ្វារអាងស្តុកទឹកទាំង២ទំនប់ដើម្បីជួយដល់បងប្អូនប្រជាកសិករយើង។

ហេតុដូចនេះសូមពុកម៉ែ បងប្អូនជ្រាបជាព័ត៌មាន និងចូលរួមសហការជាមួយអាជ្ញាធរមូលដ្ឋាន នៃការប្រើប្រាស់ទឹក ក្នុងស្មារតីសាមគ្គីភាព ប្រកបដោយការយោគយល់។

ប្រភព៖ រដ្ឋបាលខេត្តពោធិ៍សាត់