ខេត្តរតនគិរី៖ ថ្ងៃព្រហស្បតិ៍ ទី០១ ខែឧសភា ឆ្នាំ២០២៥ លោកឧត្តមសេនីយ៍ទោ អ៊ុង សុភាព ស្នងការ នៃស្នងការនគរបាលខេត្តរតនគិរី បានដឹកនាំក្រុមការងារនៃស្នងការដ្ឋាននគរបាលខេត្តរតនគិរី អញ្ជើញចុះត្រួតពិនិត្យការងារនៅអធិការដ្ឋាននគរបាលស្រុកកូនមុំ និងចុះសួរសុខទុក្ខកងកម្លាំងប៉ុស្តិ៍នគរបាលរដ្ឋបាលព្រមទាំងត្រួតពិនិត្យភូមិសាស្ត្រប៉ុស្តិ៍នគរបាលរដ្ឋបាលទាំង៦ឃុំ។  

នាឱកាសចុះទៅតាមប៉ុស្តិ៍នគរបាលរដ្ឋបាលនីមួយៗទាំង៦ប៉ុស្តិ៍​ លោកឧត្តមសេនីយ៍ទោស្នងការ បានសាកសួរផ្ទាល់ពីសុខទុក្ខរបស់កងកម្លាំងនគរបាល ព្រមទាំងប្រជាការពារដែលរួមចំណែក ក្នុងកិច្ចការពារសន្តិសុខ សុវត្ថិភាព សណ្តាប់ធ្នាប់ជូនប្រជាពលរដ្ឋក្នុងមូលដ្ឋានរបស់ខ្លួន និងបានស្វែងយល់ពីភូមិសាស្រ្តគ្រប់គ្រងរបស់ប៉ុស្តិ៍នគរបាលសំដៅពិនិត្យមើលលើការប្រឈម និងវិធានការទប់ស្កាត់បទល្មើសផ្សេងៗដែលងាយបង្ករឡើងពីក្រុមជនល្មើស បន្ទាប់មកលោកឧត្តមសេនីយ៍ទោស្នងការក៏បានផ្តល់ប្រសាសន៍ដឹកនាំបន្ថែមទៀតទៅកាន់កងកម្លាំងនគរបាលយើងដើម្បីពង្រឹងការងារអោយកាន់តែមានប្រសិទ្ធភាព។

ក្រោយបញ្ចប់ការងារត្រួតពិនិត្យនៅអធិការដ្ឋានស្រុកនិងប៉ុស្តិ៍នគរបាលរដ្ឋបាលទាំង៦ឃុំ ដែលមានឃុំស្រែអង្គ្រង ឃុំត្រពាំងក្រហម ឃុំតឺន ឃុំសិរីមង្គល ឃុំត្រពាំងច្រេស និងឃុំតាអង រួចមក លោកឧត្តមសេនីយ៍ទោស្នងការ និងក្រុមការងារក៏ដូចជាកម្លាំងនគរបាលនៃអធិការដ្ឋាននគរបាលស្រុកកូនមុំ បានរៀបចំទទួលទានអាហារសាមគ្គីដើម្បីអរគុណនិងលើកទឹកចិត្តដល់កងកម្លាំងនគរបាលដែលខិតខំបំពេញការងារក្នុងពេលកន្លងមកយ៉ាងមានភាពកក់ក្តៅនិងសោមនស្សរីករាយ៕

ប្រភព៖ ស្នងការដ្ឋាននគរបាលខេត្តរតនគិរី