មណ្ឌលគិរី៖ នៅថ្ងៃទី១៧ ខែកក្កដា ឆ្នាំ២០២៦នេះ ស្នងការដ្ឋាននគរបាលខេត្តមណ្ឌលគិរី បានរៀបចំកិច្ចប្រជុំបូកសរុបលទ្ធផល កិច្ចសហប្រតិបត្តិការ រក្សាសន្តិសុខ សណ្ដាប់ធ្នាប់តាមតំបន់ព្រំដែនប្រចាំឆមាសទី១ ឆ្នាំ២០២៦ និងលើកទិសដៅសហប្រតិបត្តិការឆមាសទី២ ឆ្នាំ២០២៦ រវាងស្នងការដ្ឋាននគរបាលខេត្តមណ្ឌលគិរី (កម្ពុជា) និងស្នងការដ្ឋាននគរបាលខេត្តដាក់ឡាក់ (វៀតណាម) ដែលដឹកនាំកិច្ចប្រជុំដោយ លោកឧត្តមសេនីយ៍ត្រី ជា ចិត្រា ស្នងការនគរបាលខេត្តមណ្ឌលគិរី ព្រមទាំង លោកឧត្តមសេនីយ៍ត្រី ឆាយ សុខា អនុប្រធាននាយកដ្ឋាន ទទួលបន្ទុកកិច្ចការព្រំដែន កម្ពុជា-វៀតណាម នៃអគ្គស្នងការដ្ឋាននគរបាលជាតិ ព្រមទាំង លោក លោកស្រី ប្រតិភូទាំងប្រទេសទាំងពីរជាច្រេីនរូបទៀត។

ក្នុងកិច្ចប្រជុំនោះដែរ ភាគីទាំងពីរបាន ពិភាក្សាលើកិច្ចការងារដូចជា រួមគ្នាសហការទប់ស្កាត់ បង្ក្រាបបទល្មើសឆ្លងដែនខុសច្បាប់គ្រប់ប្រភេទ ដែលកើតមាននៅតាមខ្សែបន្ទាត់ព្រំដែន បន្តសហការរក្សាការពារសន្តិសុខ សណ្ដាប់ធ្នាប់តាមតំបន់ព្រំដែន ទប់ស្កាត់ត្រួតពិនិត្យ ការឆ្លងដែនចេញចូលខុសច្បាប់ ជាពិសេសសហការទប់ស្កាត់ លុបបំបាត់ឱ្យបានទាន់ពេលវេលា នូវបទល្មើសអនឡាញស្កេម(Online Scams) ក្នុងទូទាំងខេត្ត៕

ប្រភព៖ ស្នងការដ្ឋាននគរបាលខេត្តមណ្ឌលគិរី