ប៉ៃលិន៖ នៅថ្ងៃអាទិត្យ ទី១៨ ខែតុលា ឆ្នាំ២០២៦ លោកឧត្តមសេនីយ៍ទោ សេង សុគន្ធ ស្នងការ នៃស្នងការដ្ឋាននគរបាលខេត្តប៉ៃលិន បានអញ្ជើញជាអធិបតីភាព ក្នុងកិច្ចប្រជុំបូកសរុបលទ្ធផលការងារក្នុងការរក្សាសន្តិសុខ សណ្តាប់ធ្នាប់សង្គម ប្រចាំខែតុលា និងលើកទិសដៅអនុវត្តបន្តសម្រាប់ខែវិច្ឆិកា ឆ្នាំ២០២៦ របស់ស្នងការដ្ឋាននគរបាលខេត្តប៉ៃលិន។

កិច្ចប្រជុំនេះដែរ ក៏មានការអញ្ជើញចូលរួមពី លោក-លោកស្រី ស្នងការរង លោកនាយ-នាយរងការិយាល័យ លោកអធិការ-អធិការរងក្រុង-ស្រុក លោកមេបញ្ជាការ-មេបញ្ជាការរង វរសេនាតូចនគរបាលការពារព្រំដែនគោកលេខ៨២១ និងលោកនាយប៉ុស្តិ៍នគរបាលរដ្ឋបាលទាំង០៨ ឃុំ/សង្កាត់។

លោកស្នងការ បានផ្តល់អនុសាសន៍ណែនាំ និងបានដាក់ចេញនូវទិសដៅការងារចំនួន ៤ ចំណុចសំខាន់ៗ សម្រាប់អនុវត្តបន្ត៖

ការចាត់វិធានការជំរុញការផ្សព្វផ្សាយ និងអប់រំណែនាំដល់ប្រជាពលរដ្ឋឲ្យយល់ដឹងអំពីច្បាប់ចរាចរណ៍ ជំរុញការល្បាត ការពារ និងស្រាវជ្រាវបង្ក្រាបបទល្មើសលួច ឆក់ ប្លន់ និងក្មេងទំនើង ឱ្យបានទាន់ពេលវេលា ដើម្បីធានាសុវត្ថិភាព ជូនប្រជាពលរដ្ឋក្នុងមូលដ្ឋាន ពង្រឹងការគ្រប់គ្រងស្ថិតិ និងការស្នាក់នៅរបស់ជនបរទេសឱ្យបានហ្មត់ចត់ ព្រមទាំងបង្កើនវិធានការស្រាវជ្រាវ បង្កើនការទប់ស្កាត់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (ស្កេមអនឡាញ) ឱ្យមានប្រសិទ្ធភាពខ្ពស់ ជំរុញការផ្សព្វផ្សាយ និងសម្រួលការផ្តល់សេវាធ្វើអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋឱ្យបានឆាប់រហ័ស។

លោកស្នងការ បានផ្តាំផ្ញើដល់កងកម្លាំងនគរបាលទាំងអស់ ត្រូវបន្តពង្រឹងកិច្ចសហការ សាមគ្គីភាពផ្ទៃក្នុង និងយកចិត្តទុកដាក់អនុវត្តបទបញ្ជាឱ្យបានម៉ឺងម៉ាត់ ដើម្បីថែរក្សាសន្តិសុខ របៀបរៀបរយ និងសណ្តាប់ធ្នាប់សង្គមជូនប្រជាពលរដ្ឋក្នុងខេត្តប៉ៃលិនទាំងមូលឱ្យបានល្អប្រសើរ៕

ប្រភព៖ ស្នងការដ្ឋាននគរបាលខេត្តប៉ៃលិន