ស្ទឹងត្រែង៖នាល្ងាចថ្ងៃអង្គារ ទី១២ ខែកក្កដា ឆ្នាំ២០២២  ឯកឧត្តម ស្វាយ សំអ៊ាង អភិបាលនៃគណៈ​អភិបាលខេត្តស្ទឹងត្រែង និងលោកជំទាវ  ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងលោកជំទាវ ព្រមទាំង ថ្នាក់ដឹកនាំមន្រ្តីរាជការក្នុងខេត្ត បានអញ្ជើញដង្ហែរប្រគេន ទៀនព្រះវស្សា ទេយ្យទាន និងបច្ច័​យ​ទៅប្រគេនព្រះសង្ឃគង់នៅចាំព្រះវស្សាក្នុងវត្ត ចំនួន ១១ ស្ថិតនៅក្នុងខេត្តស្ទឹងត្រែង ។ ពិធីនេះបា​ន​ប្រព្រឹត្តទៅក្នុង ស្រះកែវមុនី្ទវណ្ណនិង ប្រារព្ធតាមបែបព្រះពុទ្ធសាសនា ។

មានប្រសាសន៍ក្នុងឱកាសនោះ ឯកឧត្តម ស្វាយ សំអ៊ាង បានបញ្ជាក់ថា ទៀនព្រះវស្សា និងទេយ្យ​ទាន យកមក​វេរប្រគេនព្រះសង្ឃនាពេលនេះ គឺជា ការគោរព តាមប្រពៃណី ព្រះពុទ្ធសាសនា និងដើម្បីជួយ​សំរាលការលំបាករបស់ព្រះសង្ឃ ក្នុងរយៈពេលគង់ចាំព្រះវស្សារយៈពេល៣ខែនៅទីវត្តអារាម ដែលក្នុង​រយៈ​ពេលនេះព្រះសង្ឃមិនអាចនិមន្តចេញទៅបិណ្ឌបាត្របាន ព្រោះរដូវវស្សានេះមាន​ភ្លៀងធ្លាក់ជោគ​ជាំ។

ឯកឧត្តមបានបន្តថា÷ ក្នុងឱកាសដែលព្រះសង្ឃចូលកាន់ព្រះវស្សារយៈពេល៣ខែនេះ គឺជាពេលវេលា​មួយ​យ៉ាងសំខាន់សម្រាប់ព្រះសង្ឃមានឱកាសគ្រប់គ្រាន់ក្នុងការសិក្សា រៀនសូត្រ នូវ ធម៌វិន័យ របស់​ព្រះសម្មាសាម្ពុទ្ធ ដោយប្រើប្រាស់ទានព្រះវស្សាទៅដុតបំភ្លឺ បូជា ថ្វាយដល់គុណព្រះរតន​ត្រ័យ​ផង​ដែរ។

ឯកឧត្តមអភិបាលខេត្ត ក៏បានស្នើដល់ពុទ្ធបរិស័ទ គណៈកម្មការវត្ត និងព្រះសង្ឃត្រូវមានសាមគ្គី​ភាព​គ្នាជាធ្លុងមួយ ខិតខំអភិវឌ្ឍន៍កសាងវត្តឱ្យមានភាពរីកចម្រើន ដើម្បីទាក់ទាញពុទ្ធបរិស័ទជិតឆ្ងាយ​ឲ្យមកកាន់វត្តនេះកាន់តែច្រើនឡើង ធានារក្សាឲ្យបាននូវប្រពៃណីទំនៀមទម្លាប់ និងអត្តសញ្ញាណ​ជាតិខ្មែរ។

សូមបញ្ជាក់ថា ទានព្រះវស្សា និង ទេយ្យទានដែលវត្តទាំង១១ ដោយក្នុង១វត្តទទួលបាន​ទានព្រះវ​ស្សា​១គូរ អង្ករ ១៥០ គ.ក្រ មី២កេស ទឹកផ្លែឈើ០២កេស ទឹកសុទ្ធ០៣កេស  ទេយ្យទាន០១គួ ត្រីខកំប៉ុង ០១ កេស. ខ្ទឹមសរ ០៥ គ.ក្រ ប៊ីចេង ០៥ គ.ក្រ នឹង បច្ច័យក្នុងមួយៗ វត្ត១,៣០០,០០០រៀល៕

ប្រភព៖ រដ្ឋបាលខេត្តស្ទឹងត្រែង