នៅថ្ងៃទី២៤ ខែមករា ឆ្នាំ២០២៣ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ បានអញ្ជើញចូលរួមក្នុងកិច្ចប្រជុំ ជាមួយប្រតិភូកងទ័ពភូមិភាគទី១ របស់ថៃ ដឹកនាំដោយឯកឧត្តម ឧត្តមសេនីយ៍ទោ ផាក់ណា ខ្លែវផ្លតធុក មេបញ្ជាការកងទ័ពភូមិភាគទី១ របស់ថៃ និងអភិបាលខេត្តស្រះកែវ ដែលពិធីនេះប្រារព្ធធ្វើឡើងក្នុងបរិវេណស្ពានមិត្តភាព កម្ពុជា-ថៃ ស្ថិតនៅច្រកអន្តរជាតិ ប៉ោយប៉ែត-ខ្លងលឹក។
គួរបញ្ជាក់ថា គោលបំណង ក្នុងកិច្ចប្រជុំនេះ ដើម្បីសំណេះសំណាលពិភាក្សាការងារ ក្នុងន័យ រឹតចំណងសម្ព័ន្ធមេត្រីភាព និងកិច្ចសហប្រតិបត្តិការរវាងកងទ័ពប្រទេសទាំងពីរ ដូចជា៖ ការដោះស្រាយបញ្ហា តាមតំបន់ព្រំដែនបានកាន់តែល្អប្រសើរឡើង, បន្តអនុវត្តន៍យន្តការ នៃជំនួបពិភាក្សារវាងមេបញ្ជាការកងទ័ពជើងគោក នៃប្រទេសទាំងពីរ, គាំទ្រសកម្មភាពការចាក់វ៉ាក់សាំងបង្ការជំងឺកូវីដ-១៩ រវាងប្រជាពលរដ្ឋ នៃប្រទេសទាំងពីរ, បន្តកិច្ចសហប្រតិបត្តការទប់ស្កាត់ បញ្ហាគ្រឿងញៀន ចោរកម្មឆ្លងដែន ការកាប់បំផ្លាញព្រៃឈើ បទល្មើសផ្សេងៗ និងទប់ស្កាត់អំពើរភេរវកម្ម ឧក្រិដកម្ម តាមបណ្តោយព្រំដែន៕
ប្រភព៖ រដ្ឋបាលខេត្តបន្ទាយមានជ័យ
