ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងលោកជំទាវ បានអញ្ជើញចុះពិនិត្យមើល និងជួបសំណេះសំណាលជាមួយ ពុក ម៉ែ បងប្អូន ក្នុងកម្មវិធីពិនិត្យ ព្យាបាល និងផ្តល់វ៉ែនតាជូនប្រជាជន ដោយឥតគិតថ្លៃរបស់ក្រុមគ្រូពេទ្យស្ម័គ្រចិត្ត នៃសមាគមសុខាភិបាលខ្មែរ នៅសហរដ្ឋអាមេរិក សរុបប្រមាណ ២០០នាក់ ចាប់ពីថ្ងៃទី៣០ មករា ដល់ថ្ងៃទី៤ ខែកុម្ភៈ ឆ្នាំ២០២៣ នៅសាលាបឋមសិក្សា ឬស្សីក្រោក ឃុំឬស្សីក្រោក ស្រុកមង្គលបូរី។

ក្នុងឱកាសអញ្ជើញពិនិត្យមើលនោះ ឯកឧត្តម អ៊ុំ រាត្រី អភិបាលខេត្ត បានថ្លែងអំណរគុណចំពោះ ក្រុមគ្រូពេទ្យស្ម័គ្រចិត្ត នៃសមាគមសុខាភិបាលខ្មែរ នៅសហរដ្ឋអាមេរិក ដែលបានចុះមកជួយពិនិត្យព្យាបាលជំងឺជូនបងប្អូននាពេលនេះ វាពិតជាការចូលរួមចំណែកយ៉ាងសំខាន ក្នុងការលើកកម្ពស់សុខមាលភាព សុខភាពប្រជាពលរដ្ឋក្នុងខេត្ត។

ជាមួយគ្នានោះ ឯកឧត្តមអភិបាលខេត្ត បានផ្ញើសារអញ្ជើញពុកម៉ែបងប្អូនប្រជាពលរដ្ឋ ដែលមានបញ្ហាសុខភាព សូមអញ្ជើញមកពិនិត្យ និងព្យាបាលជំងឺ ដោយឥតគិតថ្លៃ៕

ប្រភព៖ រដ្ឋបាលខេត្តបន្ទាយមានជ័យ