នៅថ្ងៃទី៣១ ខែមករា ឆ្នាំ២០២៣ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានអញ្ជើញជាអធិបតីក្នុងពិធីផ្ដល់ពូជស្រូវប្រភេទសែនក្រអូប និងOM ដល់ប្រជាកសិករមកពី ៤ឃុំ នៃស្រុកសំរោង ចំនួន ១១៤៧គ្រួសារ ដែលរងគ្រោះដោយជំនន់ទឹកភ្លៀង នារដូវប្រាំងកន្លងមក ដែលពិធីចែកពូជស្រូវនេះ ធ្វើឡើងក្នុងបរិវេណវត្តខ្សាច់សរ ស្ថិតនៅឃុំទ្រា ស្រុកសំរោង។
ក្នុងឱកាសនោះដែរ ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍ថា រាជរដ្ឋាភិបាលកម្ពុជា តែងតែរួមសុខរួមទុក្ខជាមួយប្រជាពលរដ្ឋគ្រប់ពេលវេលា ហើយការផ្តល់ជូនពូជស្រូវនាពេលនេះ គឺជាការជួយអន្តរាគមន៍ជាបន្ទាន់ដល់ប្រជាពលរដ្ឋរងគ្រោះ សម្រាប់ការធ្វើស្រែស្តារឡើងវិញជាថ្មី ក្នុងនោះដែរ រដ្ឋបាលខេត្ត និងមន្ទីរជំនាញបានត្រៀមខ្លួនរួចជាស្រេចចាំជួយអន្តរាគមន៍ប្រព័ន្ធទឹក ជូនបងប្អូនស្រោចស្រពដំណាំស្រូវដែលត្រូវស្ដារឡើងវិញ។
ឯកឧត្តមអភិបាលខេត្ត បន្ថែមទៀតថា ពូជស្រូវដែលរាជរដ្ឋាភិបាលផ្តល់ជូនប្រជាកសិករ តាមរយៈ ក្រសួងកសិកម្ម ដែលផ្តល់ជូននាពេលនេះ សូមបងប្អូនប្រើប្រាស់ឱ្យបានត្រឹមត្រូវតាមលក្ខណៈបច្ចេកទេស ជៀសវាងប្រើពូជស្រូវនេះខុសបច្ចេកទេសដែលនាំឱ្យបងប្អូនខាតទាំងពូជខាតទាំងថវិកា និងពេលវេលាថែមទៀតផង ក្នុងនោះដែរក៏ត្រូវចេះទុកដាក់ពូជស្រូវនេះឱ្យបានល្អ ដើម្បីបងប្អូនអាចយកមកព្រោះបាននៅឆ្នាំក្រោយៗទៀត។
ជាមួយគ្នានេះដែរ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក៏បានធ្វើការណែនាំបន្ថែមទៀតទៅដល់ប្រជាកសិករដែលប្រកបរបរកសិកម្មនេះ សូមឆ្លៀតបង្កើតមុខរបរ ឬឆ្លៀតរកមើលដាំដំណាំណាដែលមានតម្រូវការទីផ្សារខ្ពស់ ជាពិសេសគឺអាចនាំចេញទៅក្រៅប្រទេសបាន ដើម្បីជួយផ្គត់ផ្គង់ជីវភាពរបស់បងប្អូននៅក្នុងគ្រួសារកាន់តែធូរធារ និងកាត់បន្ថយបានច្រើននូវភាពក្រីក្រផងដែរ។
បើតាមរបាយការណ៍របស់ លោក ញ៉ឹប ស្រ៊ន ប្រធានមន្ទីកសិកម្មខេត្ត បានឱ្យដឹងថា ស្រុកសំរោង ស្រែប្រាំង របស់ប្រជាពលរដ្ឋរងគ្រោះដោយសារជំនន់ទឹកភ្លៀង សរុបចំនួន ៧០១ហិកតា ស្មើនឹង ១១៤៧គ្រួសារ ដោយក្នុងមួយគ្រួសារៗ ទទួលបានពូជស្រូវចំនួន ១០០គីឡូក្រាម សរុបជារួមចំនួន ១១៤៧០០គីឡូក្រាម៕
ប្រភព៖ រដ្ឋបាលខេត្តតាកែវ