នៅព្រឹកថ្ងៃអង្គារ ទី១៤ ខែមីនា ឆ្នាំ២០២៣ រដ្ឋបាលខេត្តបាត់ដំបង បានរៀបចំពិធីបើកសន្និបាតបូកស រុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់រដ្ឋបាលខេត្តបាត់ដំបង ក្រោមអធិបតីភាព ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាល នៃគណៈ អភិបាលខេត្តបាត់ដំបង។
ឯកឧត្តម សុខ លូ មានប្រសាសន៍បើកក្នុងអង្គសន្និបាតបូកសរុបលទ្ធផលការងារប្រចាំឆ្នាំ២០២២ ក្នុងឱកាសសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់រដ្ឋបាលខេត្តបាត់ដំបង បានរៀបចំធ្វើបទអន្តរាគមន៍លើប្រធានបទចំនួន៥រួមមាន៖
១. ការអនុវត្តគោលនយោបាយភូមិ ឃុំ មានសុវត្ថិភាព
២. ការគ្រប់គ្រងដែនការពារអភិរក្ស ធនធានធម្មជាតិ
៣. ការដោះស្រាយទំនាស់ក្រៅប្រព័ន្ធតុលាការ
៤. ការរៀបចំក្រុងបាត់ដំបងក្នុងការចូលរួមអនុវត្តគម្រោងទីក្រុងឆ្លាត (Smart City)
៥. ការងារវឌ្ឍនភាពនៃការរៀបចំសោភណ័ភាព សណ្ដាប់ធ្នាប់សាធារណៈតាមទីប្រជុំជនក្រុង ស្រុក
ប្រធានបទទាំង៥ខាងលើនេះនឹងវាយតម្លៃ ឆ្លុះបញ្ចាំងកាន់តែមានភាពច្បាស់លាស់ទៅលើស្ថានភាពនៃការអនុវត្តការងារជាក់ស្តែង និងបញ្ហាប្រឈមនានាដែលនៅសេសសល់ ការរកដំណោះស្រាយ និង កំណត់ទិសដៅសម្រាប់អនុវត្តនាពេលខាងមុខដើម្បីចូលរួមអភិវឌ្ឍនសេដ្ឋកិច្ចសង្គម ការដោះស្រាយជីវភាពរស់នៅ ប្រជាពលរដ្ឋនិងធានាសុខដុមនីយកម្មសង្គមជាតិ ព្រមទាំងធានាដំណើរការប្រក្រតីភាពនៃការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ និងស្វាគមន៍ព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣។
ឯកឧត្តមបន្តទៀតថា ឈរលើមូលដ្ឋាននៃសមិទ្ធផលដែលសម្រេចបាននេះបង្ហាញឱ្យឃើញកាន់ តែច្បាស់អំពីការចូលរួមអនុវត្ត យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជានៅ ក្នុងអាណត្តិទី៦ ក្រោមការដឹកនាំដ៏ឈ្លាសវៃប្រកបដោយ គតិបណ្ឌិតរបស់សម្តេចអគ្គមហាសេនាប តី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកំពុងបន្តធ្វើកំណែទម្រង់លើវិស័យជាច្រើន ដើម្បីកំណើនការងារសមធម៌ និងប្រសិទ្ធភាពឆ្លើយតបទៅនឹងតម្រូវការចាំបាច់ជាក់ស្ដែង នៅមូលដ្ឋានដោយឆ្លុះបញ្ចាំងឱ្យឃើញអំពីការប្ដេជ្ញាចិត្តរបស់រាជរដ្ឋភិបាលក្នុងការលើកស្ទួយសុខុមាលភាពរបស់ប្រជាពលរដ្ឋ ព្រមទាំងជំរុញដំណើរការកំណែទម្រង់វិមជ្ឈការ និង វិសហមជ្ឈការក្នុងការផ្ទេរ មុខងារ និងធនធានតាមរយៈការធ្វើប្រតិភូកម្មអំណាចការប្រគល់មុខងារមកឲ្យរដ្ឋបាលថ្នាក់ក្រោមជាតិក្នុងនោះរដ្ឋបាលខេត្តគ្រប់គ្រងលើវិស័យសុខាភិបាល កុមារកំព្រា រដ្ឋបាលក្រុង ស្រុក ក្នុងខេត្តបាត់ដំបង បានទទួលនូវមុខងារក្នុងការគ្រប់គ្រងអនុវិស័យ៣រួមមានអនុវិស័យបឋមសិក្សា អនុវិស័យអប់រំកុមារតូច អនុវិស័យ អប់រំក្រៅប្រព័ន្ធ ហើយការគ្រប់គ្រងមុខងារលើអនុវិស័យ៣នេះត្រូវបានរៀបចំធ្វើសិក្ខាសាលាដកពិសោធន៍នៅថ្នាក់ជាតិដើម្បីត្រៀមធ្វើការផ្ទេរមុខងារទៅឲ្យរដ្ឋបាលក្រុង ស្រុក ខណ្ឌ នៅទូទាំងប្រទេស។
ឯកឧត្តមបន្តថា នៅក្នុងឆ្នាំ២០២៣ បានធ្វើការពង្រឹងការគ្រប់គ្រង ដឹកនាំនិងការផ្តល់ សេវាសាធារណៈជូនប្រជាពលរដ្ឋនៅតាមមូលដ្ឋានឲ្យកាន់តែមានភាពល្អប្រសើរឡើង តាមរយៈការដាក់ឲ្យអនុវត្តរួចមកហើយអង្គភាពច្រកចេញចូលតែមួយនៅសាលាខេត្ត ការិយាល័យច្រកចេញចូលតែមួយនៅសាលាក្រុង ស្រុកទាំង១៤ការិយាល័យប្រជាពលរដ្ឋនៅសាលាខេត្ត និងសាលាក្រុង ស្រុក និងការរៀបចំយន្តការច្រកចេញចូលតែមួយនៅសាលាឃុំ សង្កាត់ទាំង១០៣ ទូទាំងខេត្ត ។
ឯកឧត្តម បានបន្តទៀតថា អាស្រ័យដោយប្រទេសជាតិ និងនៅក្នុងមូលដ្ឋានខេត្តបាត់ដំបងរបស់យើងមានសុខសន្តិភាព ស្ថិរភាព នយោបាយ សន្តិសុខសុវត្ថិភាព សណ្តាប់ធ្នាប់សង្គមល្អជាមូលដ្ឋានគ្រឹះផ្តល់ភាពអនុគ្រោះគ្រប់បែបយ៉ាងសម្រាប់ ការវិនិយោគ បង្កលក្ខណៈដល់ការស្តារ និងអភិវឌ្ឍន៍ប្រទេសជាតិ ក៏ដូចជាការអភិវឌ្ឍន៍ខេត្តលើគ្រប់វិស័យ ក្រោមការដឹកនាំ និងចង្អុលណែនាំជាប់ជាប្រចាំពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្តីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង ដោយមានកិច្ចសហការល្អ ពីគ្រប់ស្ថាប័ន មន្ទីរ អង្គភាព រដ្ឋបាលមូលដ្ឋាន និងសមត្ថកិច្ចពាក់ព័ន្ធ កងកម្លាំងប្រដាប់អាវុធបានធ្វើឱ្យខេត្ត បាត់ដំបងបោះជំហានលើដំណើរការអភិវឌ្ឍរីកចម្រើនឥតឈប់ឈរ និងមានការប្រែប្រួលមុខមាត់ថ្មីជាបន្តបន្ទាប់ រួមចំណែកលើកស្ទួយកម្រិតជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ។ព្រមជាមួយ នេះទីក្រុងបាត់ដំបងរបស់យើងពិតជាមានមោទនភាពជាខ្លាំង ត្រូវបានជ្រើសរើសជាបណ្តាញទីក្រុងអាស៊ាន ក្នុងចំណោមទីក្រុងចំនួន៣នៃព្រះរាជាណាចក្រកម្ពុជា ដែលមានសមាជិកបណ្តាញទីក្រុងឆ្លាតអាស៊ានចំនួន២៦ដែលបានផ្តួចផ្តើមឡើងតាំងពីឆ្នាំ២០១៨ ដោយខេត្តបាត់ដំបងយើងចូលរួមអនុវត្តគម្រោងទីក្រុងឆ្លាតតាមរយៈ ការអភិវឌ្ឍចំនួន២ គឺការគ្រប់គ្រងលំហសាធារណៈ និងចំណីផ្លូវ និងការគ្រប់គ្រងសំណល់រឹង និងរាវ។
ការអនុវត្តគម្រោងនេះ រដ្ឋបាលខេត្តក៏បានខិតខំតម្រង់ទិសការងារអភិវឌ្ឍឲ្យស្របតាមគោលគំនិតទីក្រុងឆ្លាត ដោយមានការចូលរួមពីអ្នកពាក់ព័ន្ធ ទទួលបានសមិទ្ធផលដូចជា លើកកម្ពស់សោភ័ណភាព សណ្ដាប់ធ្នាប់តាមដងផ្លូវមួយចំនួន រៀបចំសំយ៉ាប ស្លាកយីហោផ្សព្វផ្សាយពាណិជ្ជកម្ម ផ្លូវខឿងហែម បណ្តាញភ្លើងអគ្គិសនី ខ្សែកាប បណ្តាញលូរំដោះទឹកភ្លៀង លូរំដោះទឹកស្អុយ រៀបចំផែនទីបង្ហាញផ្លូវ និងការតម្រង់ទិសអភិវឌ្ឍន៍ស្របតាម ផែនការប្រើប្រាស់ដីក្រុងបាត់ដំបងប្រកបដោយចីរភាព និងឆ្លាតវៃ ចុះអនុស្សារណៈយោគយល់គ្នាជាមួយក្រុមហ៊ុនជប៉ុនចំនួន៣ ដើម្បីសិក្សាជម្រុញការអនុវត្តគម្រោងទីក្រុងឆ្លាតក្រុងបាត់ដំបង និងពិភាក្សាជាមួយធនាគារអភិវឌ្ឍអាស៊ី លើគម្រោងគ្រប់គ្រងហិរញ្ញប្បទានឆ្លាតលើសេវាប្រមូលសំរាម ដូចជាការប្រើប្រាស់ប្រព័ន្ធព័ត៌មានភូមិសាស្ត្រ និងបង្កើតឲ្យមានការបង់សេវាប្រមូលសំរាមតាមអនឡាញជាដើម។ ក្នុងនាមជាទីក្រុងបេក្ខភាពប្រកួតប្រជែងទីក្រុងស្អាត និងការរៀបចំព្រឹត្តិការណ៍ធំៗនៅក្រុងបាត់ដំបង សម្រាប់ឆ្នាំ២០២២ កន្លងមកនេះបានទាក់ទាញភ្ញៀវជាតិ អន្តរជាតិមកទស្សនាយ៉ាងច្រើនកុះករ និងបានចូលរួម ប្រឡងប្រណាំងក្នុងក្របខ័ណ្ឌអាស៊ាន ធ្វើឲ្យទីក្រុងបាត់ដំបងទទួលនូវពានរង្វាន់ទីក្រុងទេសចរណ៍ស្អាត អាស៊ានលើកទី៣ (២០២២.២០២៤) ក្នុងវេទិកាទេសចរណ៍អាស៊ាននៅក្រុងព្រះសីហនុ និងថ្មីៗនេះទទួលបានពានរង្វាន់ជ័យលាភីលេខ១ ជា " ទីក្រុងដែលមានពិធីបុណ្យចូលឆ្នាំសកលល្អជាងគេប្រចាំឆ្នាំ២០២២* (Best Countdown City of The Year 2022) របស់ក្រុងបាត់ដំបង ខេត្តបាត់ដំបង និងពានរង្វាន់ជ័យលាភី"ទីក្រុងស្អាត ផ្ការំដួល៣ទង លើកទី៣ ឆ្នាំ២០២២-២០២៥ "របស់ក្រុងបាត់ដំបង ខេត្តបាត់ដំបង ៕
ប្រភព៖រដ្ឋបាលខេត្តបាត់ដំបង
