នាព្រឹកថ្ងៃព្រហស្បត៍ ១៨ ខែ កក្កដា ឆ្នាំ២០១៩ លោកជំទាវ និន សាផុន ប្រធានគណៈកម្មការទី៩នៃរដ្ឋសភា បានដឹកនាំគណៈប្រតិភូ ជួបសំណេះសំណាល និងពិភាក្សាការងារ ជាមួយរដ្ឋបាលខេត្តបន្ទាយមាន ជ័យ ដឹកនាំដោយ ឯកឧត្តម អ៊ុំ រាត្រី អភិបាលនៃគណៈអភិបាលខេត្ត ឯកឧត្តមសមាជិកក្រុមប្រឹក្សាខេត្ត លោកជំទាវអភិបាលរងខេត្ត និងមានអញ្ជើញចូលរួមពីមន្ទីរ អង្គភាពពាក់ព័ន្ធជុំវិញខេត្ត។
លោកជំទាវ និន សាផុន ប្រធានគណៈកម្មការទី៩នៃរដ្ឋសភា ដើម្បីសិក្សាស្វែងយល់ពីសភាពការណ៍ទូទៅរបស់រដ្ឋបាលខេត្ត របាយការណ៍លទ្ធផលការងារសម្រេចបាន វឌ្ឍនភាពការងារ បញ្ហាប្រឈម និងទិសដៅភារកិច្ចអនុវត្តបន្តរបស់មន្ទីរជំនាញ ដែលពាក់ព័ន្ធនិងវិស័យការងារក្នុងរង្វង់សមត្ថកិច្ចទទួល ខុសត្រូវរបស់គណៈកម្មការ និងផែនការទិសដៅបន្តក្នុងការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦នៃរដ្ឋសភា ។
ឯកឧត្តម អ៊ុំ រាត្រី អភិបាលនៃគណៈអភិបាលខេត្តបានមានប្រសាសន៍ រាយសង្ខេបអំពីលទ្ធផលការងាររបស់រដ្ឋបាលខេត្ត ការផ្តល់សេវាសាធារណៈជូនបងប្អូនប្រជាពលរដ្ឋ ការងារសន្តិសុខ សណ្តាប់ធាប់សាធារណៈ ការងារសាធារណការ និងដឹកជញ្ជូន ការងារប្រៃសនីយ៍ និងទូរគមនាគមន៍ ការងារឧស្សាហកម្ម និងសិប្បកម្ម ការងាររ៉ែ និងថាមពល ការងារពាណិជ្ជកម្ម ការងារសាខាកាំកុងត្រូល និងការងាររបស់មន្ទីររៀបចំដែនដី នគរូបនីកម្ម សំណង់ និងសូរិយោដី ព្រមទាំងលើកឡើងអំពីបញ្ហាប្រឈម និងសំណូមពរមួយចំនួនជូនគណៈ ប្រតិភូនៃគណៈកម្មការទី៩ នៃរដ្ឋសភា ដើម្បីទទួលជ្រាបផងដែរ៕
ប្រភព៖ រដ្ឋបាលខេត្តបន្ទាយមានជ័យ