នារសៀល ថ្ងៃព្រហស្បតិ៍ ១៨ ខែកក្កដា ឆ្នាំ២០១៩ ក្រុមប្រឹក្សាខេត្ត អភិបាល នៃគណៈអភិបាលខេត្ត មន្ទីរជំនាញ រួមមានមន្ទីរសាធាណៈការ និងដឹកជញ្ជូន មន្ទីរប្រៃសណីយ៍ទូរគមនាគមន៍ មន្ទីរឧស្សាហកម្ម សិប្បកម្ម មន្ទីររ៉ែនិងថាមពល មន្ទីរពាណិជ្ជកម្ម និងមន្ទីររៀបចំដែនដីនគររូបនីយកម្ម និងសំណង់ ដែលដឹកនាំ ដោយ ឯកឧត្ដម ប៉ែន កុសល្យ អភិបាលខេត្តឧត្ដរមានជ័យ ទទួលជួបពិភាក្សាការងារ គណៈប្រតិភូគណៈកម្មការទី៩ នៃ រដ្ឋសភា ដើម្បីបង្ហាញពីប្រសិទ្ធភាពនៃការប្រតិបត្តិច្បាប់នានា ក្នុងការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល។
ឯកឧត្ដម ប៉ែន កុសល្យ បានលើកឡើងថា ខេត្តឧត្ដរមានជ័យ គឺជាខេត្តដែលពឹងផ្អែកទៅលើវិស័យសំខាន់ៗរួមមាន៖ កសិកម្ម, រ៉ែ, ទេសចរណ៍ ក្រៅពីនេះខេត្តឧត្តរមានជ័យ មានច្រកទ្វារព្រំដែនអន្តរជាតិចំនួន៣ កំពុងដំណើរការ គឺច្រកទ្វារព្រំដែនអន្តរជាតិជាំ ស្ថិតក្នុងស្រុកអន្លង់វែង ច្រកទ្វារព្រំដែនអន្តរជាតិអូស្មាច់ ស្ថិតនៅក្រុងសំរោង និងច្រកទ្វារព្រំដែនអន្តរជាតិជប់គគីរ ក្នុងស្រុកបន្ទាយអំពិល។ ឯកឧត្ដមបានបន្តថា រដ្ឋបាលខេត្ត និង មន្ទីរ-អង្គភាពពាក់ព័ន្ធ ក៏បានយកចិត្តទុកដាក់បំពេញកាតព្វកិច្ច បម្រើសេវាសាធារណៈជូន ប្រជាពលរដ្ឋបានល្អប្រសើ ស្របតាមចក្ខុវិស័យ និងគោលនយោបាយរបស់រាជរដ្ឋាភិបាល ដោយឡែកចំពោះបញ្ហាសន្តិសុខ សណ្តាប់ធ្នាប់ សុវត្ថិភាពសង្គម វិញ គឺ រដ្ឋបាលខេត្ត រដ្ឋបាលក្រុង / ស្រុក, ឃុំ /សង្កាត់ និង ស្ថាប័នមានសមត្ថកិច្ចគ្រប់ ផ្នែក មានការសហការគ្នា រក្សា និងគ្រប់គ្រងបានល្អប្រសើ ជូនដល់ប្រជាពលរដ្ឋ ។
លោកជំទាវ និន សាផុន ប្រធានគណៈកម្មការទី៩ នៃ រដ្ឋសភា បានមានប្រសាសន៍ថា កិច្ចប្រជុំនៅពេលនេះដើម្បីស្វែងយល់ពីប្រសិទ្ធភាពនៃការប្រតិបត្តិច្បាប់នានា ក្នុងការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦ និងស្តាប់ពីបញ្ហាប្រឈមនានារបស់រដ្ឋបាលខេត្ត និងមន្ទីរជំនាញចំនួន៧ មានមន្ទីរសាធាណៈការ និងដឹកជញ្ជូន មន្ទីរប្រៃសណីយ៍ទូរគមនាគមន៍ មន្ទីរឧស្សាហកម្ម សិប្បកម្ម មន្ទីររ៉ែនិងថាមពល មន្ទីរពាណិជ្ជកម្ម និង មន្ទីររៀបចំដែនដីនគររូបនីយកម្ម និងសំណង់ សាខាកម្មកុងត្រូល ដែលមាន បញ្ហាកន្លងមក ដើម្បីកត់ត្រាអោយបានត្រឹមត្រូវ យកទៅជូនថ្នាក់លើសម្រេច និងដោះស្រាយជូន និងជាពិសេសណែនាំពីច្បាប់នានាបន្ថែមទៀត ដើម្បីជាគំនិត និងជំនាញ សំដៅការ អនុវត្តការងារនៅក្នុងស្ថាប័នអង្គភាពរបស់ខ្លួនអោយទទួលបានជោគជ័យ។
សូមបញ្ជាក់ដែរថា ខេត្តឧត្តរមានជ័យ ជាខេត្តដែលមានព្រំប្រទល់ខាងកើតជាប់ខេត្តព្រះវិហារ ខាងលិចជាប់ខេត្តបន្ទាយមានជ័យ ខាងត្បូងជាប់ខេត្តសៀមរាប និងខាងជើងជាប់ខេត្ត៣ របស់ប្រទេសថៃគឺខេត្តបុរីរ៉ាំ សុរិន្ទ និងស៊ីសាកេត។ ខេត្តឧត្តរមានជ័យ មានក្រុងចំនួន១ និងស្រុកចំនួន៤ បែងចែកជា២៤ ឃុំ-សង្កាត់ស្មើនឹង៣០៤ភូមិ ដែលមានផ្ទៃដីសរុប៦៨៤០៩២ គីឡូម៉ែត្រការ៉េ មានស្ថិតិប្រជាពលរដ្ឋសរុបចំនួន៥៨២៧៤ ស្មើនឹងប្រជាពលរដ្ឋសរុប ២៤៣១៩៧នាក់ដែលមានស្រី ១២០៦០៤ នាក់៕ គឹមអាន
ប្រភព៖ រដ្ឋបាលខេត្តឧត្ដរមានជ័យ