នៅព្រឹកថ្ងៃពុធទី១១ ខែកញ្ញា ឆ្នាំ២០១៩នេះ ឯកឧត្តម អ៊ុន ចាន់ដា អភិបាល នៃគណៈអភិបាល ខេត្តកំពង់ចាម បានដឹកនាំមន្រ្តីជំនាញ មន្ទីរ អង្គភាពពាក់ព័ន្ធទាំងអស់ ចុះពិនិត្យស្ថានភាពទឹកជំនន់ ដែលកំពុងហូរកាត់ផ្លូវ ស្ថិតនៅភូមិទួលពោ ឃុំព្រែកកក់ ស្រុកស្ទឹងត្រង់ ខេត្តកំពង់ចាម។
ឆ្លៀតក្នុងឱកាសនោះ ឯកឧត្តម អភិបាលខេត្ត និងប្រតិភូអមដំណើរ ក៏បានបន្តដំណើរ ទៅពិនិត្យសកម្មភាព នៃការជួសជុសស្ពានស្រុត ១កន្លែង ស្ថិតនៅភូមិទួលរការ ឃុំពាមកោះស្នា ស្រុកស្ទឹងត្រង់ បន្ទាប់មក បានពិនិត្យទីទួលសុវត្ថិភាព ១កន្លែងទៀតដែលស្ថិតនៅក្នុងភូមិកំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម។
សូមបញ្ជាក់ថា មកដល់ពេលនេះ កំណាត់ផ្លូវជាតិ ៧១Cដែលស្ថិតនៅភូមិទួលពោ ឃុំព្រែកកក់ ស្រុកស្ទឹងត្រង់ ត្រូវបានទឹកជន់លិច ប្រវែងប្រមាណជា ២គម និងបង្កការលំបាក ដល់ការធ្វើចរាចរឆ្លងកាត់របស់ប្រជាពលរដ្ឋ។ ហើយក៏មានប្រជាពលរដ្ឋប្រមាណ ១២២គ្រួសារ បាននឹងកំពុងស្នាក់នៅបណ្ដោះអាសន្ន នៅទីទួលសុវត្ថិភាព។ ជាមួយនោះដែរ ដើម្បីសម្រួលដល់ការរស់នៅ របស់ប្រជាពលរដ្ឋ អាជ្ញាធរ និងស្ថាប័នជំនាញ បានរៀបចំនូវប្រព័ន្ធភ្លើង ទឹកស្អាត និងស្នាក់ការប៉ុស្តិ៍សុខភាពផងដែរ៕ រតនា
ប្រភព៖ រដ្ឋបាលខេត្តកំពង់ចាម