ឯកឧត្តម ឈួរ​​ ច័ន្ទឌឿន អភិបាលខេត្តកំពង់ឆ្នាំង បានអំពាវនាវទៅកាន់ប្រជាពលរដ្ឋ​ ដែលរស់នៅក្នុងភូមិឃុំក្ដុលសែនជ័យ ស្រុកទឹកផុស អោយរស់នៅត្រូវមានអនាម័យនិងត្រូវដេកក្នុងមុងជានិច្ច ដើម្បីការពារកុំអោយកើតមានជំងឹគ្រុនចាញ់។ ឯកឧត្តម បានមានប្រសាសន៍អំពាវនាវបែបនេះ នៅក្នុងឱកាសដែលឯកឧត្តមអញ្ជើញចូលរួមក្នុងទិវាជាតិប្រយុទ្ធនឹងជំងឺគ្រុនចាញ់ ដែលបានប្រារព្ធធ្វើនៅភូមិក្តុល ឃុំក្ដុលសែនជ័យ ស្រុកទឹកផុស កាលពីថ្ងៃទី២៧ ខែមេសា ឆ្នាំ២០១៨។ ឯកឧត្តមអភិបាលខេត្ត បានមានប្រសាសន៍ទៀតថា ទិវាជាតិប្រយុទ្ធនឹងជំងឺគ្រុនចាញ់ដែលបានប្រារព្វឡើងក្នុងពេលនេះ ក្នុងគោលបំណងពញ្ញាក់ស្មារតីបងប្អូនប្រជាពលរដ្ឋអោយចូល រួមក្នុងវិធានការការពារនិងរំលឹកនូវសកម្មភាពអន្តរាគមន៍ចំបងៗ ដើម្បីឈានទៅលប់បំបាត់ជំងឺគ្រុនចាញ់ទាំងស្រុងនៅកម្ពុជានាឆ្នាំ២០២៥។ ឯកឧត្តមឈួរ ច័ន្ទឌឿនបញ្ជាក់ថា ថ្វីត្បិតតែជំងឺដ៏កាចសាហាវនេះ បានសម្លាប់ប្រជាពលរដ្ឋរៀងរាល់ឆ្នាំ តែយើងអាចការពារបាន ដោយធ្វើយ៉ាងណាកុំអោយមូសខាំ ដែលជាពិធីពិសេសមានប្រសិទ្ធភាពនោះ គឺយើងត្រូវដេកក្នុងមុងជានិច្ចទោះនៅផ្ទះឬនៅក្នុងព្រៃក៏ដោយ។ ករណីមានការសង្ស័យថាខ្លួនមានជំងឺគ្រុនចាញ់ត្រូវរួសរាន់ទៅមណ្ឌលសុខភាពឬមន្ទីរពេទ្យដែលនៅជិតបំផុត ដើម្បីទទួលបានការពិនិត្យព្យាបាលបានត្រឹមត្រូវនិងទាន់ពេលវេលា។ លោកប្រាក់ វ៉ុនប្រធានមន្ទីរសុខាភិបាលខេត្តកំពង់ឆ្នាំង បានអោយដឹងថា យោងតាមទិន្នន័យសុខាភិបាលឆ្នាំ២០១៧ នៅទូទាំងប្រទេសមានករណីជំងឺគ្រុនចាញ់សរុបចំ៤៥ ៩៩១ករណី និង ស្លាប់១ករណី ។ ដោយឡែកនៅក្នុងខេត្តកំពង់ឆ្នាំង មានករណីគ្រុនចាញ់សរុប២ ៤២២ករណី ។ ក្នុងឱកាសនោះដែរ ឯកឧត្ដមអភិបាលខេត្តបានចែកមុងជ្រលក់ថ្នាំជូនដល់ប្រជាពលរដ្ឋដែលចូលរួមក្នុងពិធីនេះផងដែរ។ ប្រភពព័ត៌មាន: រដ្ឋបាលខេត្តកំពង់ឆ្នាំង